Grupo di Arubiano pega na Venezuela lo bolbe Aruba diasabra

CARACAS/ ORANJESTAD – Un grupo di entre 40 pa 43 persona, consistiendo di Arubiano, personanan Hulandes, y residente Venezolano na Aruba ta bolbe Aruba for di Venezuela diasabra. Esaki un buelo di Laser Airlines cu Embahada di Reino Hulandes a solicita na gobierno di Venezuela, cu na su turno a aproba e buelo. E no ta uno humanitario, debi cu e condicion tabata cu e pasaheronan mes mester a paga nan pasashi. E personanan aki ta(bata) pega na Venezuela debi na e crisis di COVID-19. Problema ta cu mientras cu por trece pasahero di Venezuela pa Aruba, ainda Venezuela mes no ta cla pa ricibi personanan for di Aruba of otro destinacion. Unabez cu e grupo aki yega Aruba, nan tambe lo tin cu bay den cuarentena obligatorio pa 14 dia. 

PROTESTA

Diabierna mainta tabatin un protesta di un grupo di Venezolano cu ta bisa cu nan ta turista cu tin mas di 3 luna pega na Aruba y kier bay bek pa nan pais. Dilanti di e camera di portal 24ora.com nan tabata haci peticion na presidente Venezolano Nicolas Maduro pa permiti nan pa bolbe nan pais. Nan ta un grupo (segun nan declaracion) di 200 persona mas of menos, entre cual tin varios cu ta na estado, sin placa y cu no por sigui na Aruba mas.