Corte ta nenga peticion pa traslada presonan di St Maarten pa prison na Hulanda

PHILIPSBURG – Corte na St Maarten a dicidi cu presonan no por wordo traslada pa un prison na Hulanda. Ta trata di un grupo grandi di preso cu a demanda gobierno y minister di husticia particularmente, debi na e situacion di e prison na e isla. A pidi como tal pa transporta nan pa e facilidadnan na Hulanda. Esaki te ora cu e prison Point Blanche cumpli cu e standard internacional. 

SENTENCIA

Pero segun e sentencia, e presonan no ta admissible. Bou di e ley actual, no por convoca e minister di husticia. Y ademas e peticion di e presonan no por wordo ehecuta sin cooperacion di Hulanda. Hulanda no tabata parti di e proceso y e detenidonan den e caso no por a proba cu Hulanda ta dispuesto pa coopera cu e veredicto si esaki bin na fabor di e presonan. Tampoco por a proba cu St Maarten su gobierno por obliga Hulanda pa cumpli cu e veredicto. Esaki kier men cu no tin sentido pa tin un veredicto na fabor di e presonan. Den cuadro di esaki, a dicidi cu e presonan ta perde nan caso. Potret cortesia St MaartenNews.com