OM na Corsou ta insisti cu ex minister Schotte tin cu paga of haya mas castigo di prison

WILLEMSTAD – Ministerio Publico e siman aki na Corsou pa medio di Abogado General (AG) mr. Angela a demanda e siman aki den corte di apelacion pa ex prome minister Gerrit Schotte paga e suma di 1.8 miyon florin of sinta 3 aña mas di castigo di prison. E demanda ta den caso di expropiacion contra Schotte. E suma ta di placa cu Schotte lo a haya di un forma illegal  y cu e mester paga bek. Schotte den su declaracion ta sigura cu e no tin e placa. E no tin trabou debi cu el a cay cera y ta te 2025 e por bira politico bek. “No solamente a roba mi libertad, pero mi soño, politica y mi famia a kibra. Hasta mi mester a yega na acuerdo pa alimentacion di mi yiunan, cu mi no por cumpli cu ne”.  Abogado di Schotte, Marije Vaders a sigura cu e situacion ta uno fastioso unda cu no por saca placa di un hende cu no tin e mas. Schotte ta den prison for di November 2018 pa un periodo di 3 aña. Tabatin indicacion cu e lo a sali afo awor, cu banchi electronico pero esaki no a logra. Cortesia Extra Curacao.