Simar: Gobierno tin te diabierna pa stop mudansa Scol Paso pa Futuro

ORANJESTAD – Docentenan diahuebs anochi durante un reunion di Simar a duna sindicato e mandato pa warda te diabierna atardi riba e ultimo punto cu mester resolve, sino por spera accion dialuna. Presidente di sindicato SIMAR Josephine Albertus a splica noticiacla.com cu no obstante esaki, a logra varios cos si. Entre nan, e Ministeriele Beschikking (MB) cu lo a afecta Colegio San Nicolas, pero cu awor a keda anula, y tambe e intentieverklaring pa comberti scolnan publico den fundacion. Esaki tambe a keda elimina manera e portal aki a presenta den forma di primicia. E unico punto ainda cu falta ta e mudansa di e alumnonan di Scol Paso pa Futuro. 

MINISTER NO KIER TENDE 

Segun Albertus, a compronde cu gobierno (lesa: minister Rudy Lampe) no ta dispuesto (ainda) pa bisa cu e alumnonan di Scol Paso pa Futuro lo no muda pa otro edificio.”Esey ta e unico punto” Albertus a bisa e portal, cu ta pega. Tur otro cos Simar ta hopi contento cu a keda regla di un forma satisfactorio. Por a compronde di Albertus cu gobierno (lesa: minister presidente Evelyn Wever) a pidi poco mas tempo pa wak si durante conseho di minister di diabierna por logra algo eynan tambe. Basa riba esey, e docentena a bisa cu nan ta dispuesto pa warda esaki y duna goodwill,y lo dicidi pa fin di diabierna. “ Pero si mayan no saca nada afo, e ora dialuna scol lo habri cu accion” Albertus a finalisa bisando.