SMOA na OCCA y Obispado: Directiva di SMOA no ta retira!

ORANJESTAD – Miembronan di directiva di SMOA, ta bisa cu nan no ta bay cumpli cu e peticion di Obispado di Willemstad y OCCA, pues nan no ta bay entrega nan retiro. Asina e presidente Robert Croes III ta bisa den un carta di 5 pagina, fecha 18 di juni 2020. Nan ta duna como motibo, cu ‘den cuado di e COVID-19 crisis y den interes di Colegio, nan lo no hacie”. Ademas nan ta bisa cu ‘no tin ningun motibo presente pa e directiva pa retira”. Cu esaki, nan ta contesta e carta y e memorandum di entendimento cu a wordo traha entre Obispado y OCCA (Comision di Mayor di Colegio Arubano) y e peticion directo cu ambos a haci. Nan porta ta keda habri pa semper  delibera cu ambos instancia. 

LAMENTO

SMOA (SVOA) ta confirma tambe cu nan a ricibi e MOU (MDI)di dos dia prome, y ta lamenta cu a opta pa basa nan opinion riba noticia di rednan social sin duna directiva e espacio pa splica, violando asina tur regla di bon gobernacion. “Boso a scohe pa duna oido na e ‘corte di opinion publico’. Di otro banda e directiva ta contento cu ‘tin interes renoba den Colegio Arubano”. Nan ta referi na entre otro e incidente di menasa di ‘drive by shooting’ na januari di e aña aki, y tambe durante e crisis di COVID-19. 

RETIRO RECTOR

SMOA ta confirma cu e rector actual Michella van Loon a entrega su retiro, y cu esaki a keda acepta. “Ta su bon derecho” Croes ta bisa den su carta. Lo a compronde cu el a haya un otro trabou. “E retiro no tin consecuencia grandi pa Colegio” Croes ta sigura. 

REUNIONAN CANCELA

Pa loke ta e relacion entre e partidonan, e directiva ta bisa cu nan ta desapunta den e actuacion di Obispado, y ta recorda Obispado cu nan a cancela e reunion palabra, y OCCA a rechasa e dicho reunion. Pues e culpa no ta na SMOA. 

CRISIS ADMINISTRATIVO

Segun e directiva, si enberdad tin un crisis administrative, e ora mester a cana e caminda corecto urgente pa reuni cu directiva. Ademas e actuacion di Bisdom segun e directiva, ta mustra falta di responsabidad pidiendo retiro di e directiva completo. Esaki pasobra door di pidi e retiro, ta para e proceso di solicitud pa un rector nobo cu tin cu cuminsa traha 1 di augustus proximo. Ademas, retiro di directiva completo den un organisacion ta trece e continuidad di e organisacion den peliger, pasobra no tin un traspaso di conocemento y experiencia.”Pesey semper tin un planificacion di retiro. Banda di esaki, un tipo di retiro asina, lo tin un peliger directo pa e continuacion di Colegio Arubano, pasobra no por tuma decisionan mas. 

AUTORIDAD DI OBISPADO

E directiva ta mustra Obispado ribanan autoridad pa nombra un miembro di directiva, cual posicion ta liber desde mei 2020. “Si no nombra un persona dentro di 3 luna di e vacatura, directiva por nombra un persona. Pero ta desea pa Obispo mes yena e vacatura mas liher posibel, dunando duna sustancia na e tareanan statutorio. Asina tin un sin fin di punto cu Croes, na nomber di e directiva, ta repasa den e carta. Cu e mensahe aki, tin cu wak kico directiva y OCCA ta bay haci awor, y con tin cu interpreta e ultimo MOU cu nan a cera cu otro, y ki impacto esaki por tin. Por lesa e carta completo di SMOA AKI. 

. ?

 ?