Oduber: Situacion na hospital HOH ta keda uno critico

ORANJESTAD – “ Nos a bishita hospital awe mainta y e situacion ta keda uno critico”. Asina minister di salud Dangui Oduber a bisa diahuebs mainta. Segun e mandatario, tin hopi molester di holor di huma di candela y di asbest.” Tur e empleadonan di tanto Hospital y Imsan ta haciendo nan maximo esfuerzo pa por keda garantiza cuido bao di circunstancianan hopi dificil” e mandatario a sigui bisa. Ta trata di e situacion cu a surgi despues di e candela di diamars ultimo den e edificio. E huma di e candela a afecta e edificio internamente cu a pone cu mester a evacua tanto personal como pashent. 

AYUDO MILITAR

Manera ta conoci, por lo menos 20 marinier di e 32e Raidingsquadron na Aruba a asisti diamars anochi pa entre otro set up tentenan y cama di campo, como lugar alternativa pa atende pashent. Ademas a yuda cu mudansa di e pashentnan cu tabata necesario y hiba nan na un lugar sigur.   Tabata hefe di oficina di calamidad (BRA) Rino Hermas a haci un peticion directo na  comandante di base, esta commandante teniente coronel Art van Beekhuizen pa e asistencia.