SMOA na minister: Nunca OCCA y LVA a entrega keho na directiva

ORANJESTAD – Den un carta di e fundacion cu ta maneha Colegio Arubano, esta Stichting Middelbaar Onderwijs Aruba (SMOA)  a manda pa minister di enseñansa Rudy Lampe, nan ta sigura cu nunca nan a ricibi keho di tanto Ouder Comissie Colegio Arubano (OCCA) como Algemene Leraren Vergadering, (ALV), e fundacionan cu ta representa interes di mayornan y docente respectivamente). Ademas no ta custumber pa reacciona riba social media riba noticia di ex docentenan. Pero nan ta conciente cu tin un grupo cu ta purbando di suministra informacion incorecto di Colegio Arubano y pone den un luz negativo. Asina e presidente di e fundacion, Robert Croes III ta bisa den e carta di 8 pagina. Den cuadro di transparencia, e directiva a purba splica e mandatario di e situacion aki. Pero den e carta, e no ta toca e tema di retiro cu e Obispado di Willemstad a pidi. 

KEHONAN

Segun SMOA, e ultimo reunion cu directiva tabatin cu ALV, unda cu tabatin 60 docente, nan no a vocifera e kehonan cu nan a manda pa e minister den un carta di 14 di mei ultimo. Te cu awe ainda e kehonan no a wordo entrega na e directiva. Tambe nan ta mustra cu ALV a informa si cu no ta desea pa comunica cu e directiva, te ora Obispado reacciona riba e carta di 14 di mei ultimo. A invita e presidente di ALV pa un combersacion. No ta conoci di e carta si e combersacion aki a tuma lugar. 

ESCASES DI DOCENTE

Entre e temaman, e directiva ta relata cu atrobe tin escases di docente y den e caso aki docente di prome grado, awor cu gobierno a dicidi pa no paga e gastonan di mudamento. Como tal tin escases pa docente pa tres material. 

PAGO PA DIRECTIVA

Un punto cu a hala atencion ta e hecho cu e directiva ta mustra e minister riba e hecho cu nan no ta wordo compensa financieramente, mientras cu nan ta traha hopi ora na bienestar die e scol. Mester bisa cu hopi a interpreta e parti aki cu e directiva kier pa nan tambe wordo paga. “Esey no ta e caso” Robert Croes III a sigura e portal aki. Loke nan ta bisa ta cu nan a sugeri pa cambia e ley Landsverordening Voortgezet Onderwijs (LVO) pa asina e structura por cambia unda cu e responsabilidad diario di maneho hudiricamente ta cay bek pa e maneho di e scol, esta rectorado, envez di SMOA su directiva. Esaki pasobra mirando e trabou cu e directiva ta haciendo awor, sin pago, no ta kere cu den futuro lo haya personanan dispuesto pa asumi e funcion aki. Nan ta papia di 15 pa 30 ora pa luna cu nan mester dedica na e trabou di directiva. Lesa e carta AKI.