Maduro: A tuma e mihor desicion pa no perhudica salario di e empleado publico

ORANJESTAD - Gobierno ta sigura cu el a tuma e mihor desicion posibel pa no perhudica e empleado publico den su salario netto. Asina minister di finanza Xiomara Maduro a bisa e siman aki durante un conferencia di prensa. Segun e mandatario, e crisis di COVID19 a trece cune cu desicionnan mester a wordo tuma den forma acelera pa asina Pais Aruba no kibra debi na falta di actividad economico y situacion financiero precario. COVID19 no ta solamente un crisis di salubridad, e ta un crisis tambe di likides. Segun Maduro, ta pa e motibo aki Gobierno di Aruba mester a recuri na Reino Hulandes pa por yega na e fondonan necesario pa enfrenta e escases di likides y hunto cu ne fondonan pa tene nos economia artificialmente activo door di sosten financiero den forma di subsidio di salario. Ambos yudansa financiero di Reino Hulandes a wordo brinda den forma di un fiansa cu tin condicionnan aplicabel. Entre nan, tin como condicion cu Aruba mester baha gasto di personal. 

GOBIERNO TA REDUCI SALARIO BRUTO CU 5% 

Pa por cumpli cu e condicion di Conseho di Minister di Reino, Gobierno di Aruba a reduci e pakete di salario di e empleado publico. Entre otro, a corta 5% den e salario bruto di e empleado publico. Gobierno a purba pa tuma e mihor desicion posibel pa no perhudica e salario netto y pa asina evita cu e empleado publico den e situacion di crisis aki ta keda afecta den su posicion di likides. 

SINDICATONAN KIER CORTA PAFOR DI SALARIO

E desicion di Gobierno pa corta den salario bruto no a conta cu sosten di tur sindicato ya cu e reduccion aki tin consecuencia pa e pensioen di e empleado publico. Pesey algun sindicato ta opta pa corta e 5% pafor di e salario. Gobierno a splica e sindicatonan cu si bay corta pafor di e salario bruto, esaki lo perhudica e empleado publico mas, ya cu elo ricibi menos placa den man. E efecto lo ta un reduccion di 8,6% enves di 5%, pagando e mesun impuesto y hayando menos den man pa luna. Cu e reduccion di 5% den salario bruto, e peso di impuesto tambe ta baha y e empleado publico ta keda cu un salario netto mas halto compara cu e proposicion di sindicato. 

PENSIOEN TA KEDA AFECTA CU APENAS 4 FLORIN

Ora di corta den salario bruto esaki tin consecuencia pa e pensioen di e empleado publico. Gobierno a haci e calculacionnan necesario pa mustra sindicatonan cu e pensioen ta keda afecta cu apenas 4 florin (e suma ta 3,68 florin) pa luna y 44 florin pa aña. Esaki ta un efecto cu lo sinti te na momento di cobra e pensioen. Pa awor aki e empleado publico ta keda cu mas salario netto. Cu e proposicion di sindicato, e pensioen ta keda intacto pa dia cu por cobre, pero pa awor aki e empleado publico lo mester wordo corta 8,6% enves di 5%, kedando cu menos salario netto den cartera.

AWOR TIN CU SALBA PAIS ARUBA

Segun Maduro, ta bon pa recorda cu na 2014 sindicatonan a yuda Gobierno e tempo ey pa reduci gasto di personal door di corta den beneficio di pensioen na balor di 2000 florin pa luna y 27000 florin pa aña. Awe e Gobierno actual ta pidi sindicato pa yuda salba Pais Aruba den un situacion di crisis, cu entrega di 4 florin (e suma mes ta 3,68 florin) pa luna y 44 florin pa aña. Si nos pensa bon, e sumanan aki ta un sacrificio chikito cu ta wordo pidi di e empleado publico pa yuda salba e Pais cu nan ta sirbi cu nan trabou. Den e situacion di crisis aki Gobierno a purba tuma e mihor desicion pa asina no perhudica e empleado publico y awor sindicatonan tambe mester brinda nan aporte pa enves di perhudica, nan yuda salba Aruba.