Obispado di Willemstad y OCCA a firma MDI pa tuma SMOA over

ORANJESTAD – Pa medio di un Memorandum Di Entendimento (MDI), Bisdom di Willemstad y e comision di mayor di Colegio Arubano e siman aki a declara di lo traha hunto na bienestar di e scol y pa resolve e 'crisis administrativo' cu tin na Colegio Arubano actualmente. E intencion ta (manera e MDI ta bisa) pa ‘forma un constelacion nobo pa e directiva di Stichting Middelbaar Onderwijs Aruba (SMOA)’, ya cu nan ta sinti cu e directiva actual (forma pa dos persona) no ta funcionando. Ademas den e MDI, nan ta pidi retiro di e directiva completo di SMOA.  

RETIRO DI DIRECTIVA

Segun e memorandum, Obispado na mei ultimo caba a pidi e directiva di SMOA pa retira pa bienestar di e situacion di e scol y pa evita mas ‘crisis administrativo’. Pero SMOA no a haci esaki. Loke cu SMOA a haci, ta manda un relato di nan trabou di 2017 pa 2020, splicando tur loke cu e directiva a haci y logra. Pa loke ta e carta cu Bisdom a manda pa SMOA, a resulta cu OCCA no tabata na altura di esaki. Esey a resulta cu nan a dicidi di sostene e prolongacion di nombramento di e actual presidente di SMOA, Robert Croes III como miembro di directiva di SMOA na nomber di OCCA. Croes ta den directiva for di 2017, unda cu a nombre como miembro y despues cu tabatin varios persona cu a retira, automaticamente el a bira presidente (e tabata vice presidente). Lesa e MDI AKI.