Albertus: SIMAR a cancela marcha programa pa diaranson

ORANJESTAD – E marcha cu sindicato SIMAR a organisa pa diaranson atardi, a keda posponi diamars anochi. Asina e presidente Josephine Albertus a bisa den un conferencia di prensa. E motibo ta cu gobierno a haci su maximo esfuerso pa resolve e situacionan (firma e.o. anulacion di e intentie verklaring) y e sindicato ta aprecia e esfuerso ey. Como tal a dicidi cu ta ‘kom gobierno tegemoet’ y a dicidi pa buena marcha, cancela e marcha pasivo di mayan. 

ANULACION DI INTENTIE VERKLARING

Tabata diamars anochi cu manera cu noticiacla a raporta como primicia, gobierno y SPCOA (fundacion cu ta maneha scolnan protestant) a firma pa cancela e ‘declaracion di intencion’ (intentieverklaring) cu tabata un di e puntonan di problema cu e sindicato. Sinembargo, e articulo of punto cu tabata riba e documento, no tabata esun corecto. Enbez di 9.1, tabatin punto 8.1 cu no ta existi. Segun Albertus, gobierno a priminti di coregi e fayo aki tambe.

GRADICIMENTO

Ademas a gradici tanto minister Rudy Lampe como prome minister Evelyn Wever Croes pa nan esfuersonan grandi haci pa logra trece paz den e mundo di enseñansa. Awor lo reuni si cu e conseho di minister diaranson, unda cu lo trata e parti di entrega di salario, y lo reuni diahuebs cu prome minister Evelyn Wever pa asina atende e puntonan cu ainda falta. 

FAYO CU REUNION

Riba pregunta di noticiacla, Albertus a admiti cu enberdad e reunion di dialuna cu minister Rudy Lampe, no tabata esun miho y cu su forma di actua cu e minister no a resulta esun mas optimal, cu a pone cu e reunion no a termina bon. El a haya basta critica di e forma con el a atende cu e reunion y a admiti esey pues riba e pregunta di e portal aki. No obstante esey, e ta sigura si cu e tabata prepara pa e reunion.