Wever: Trankilidad den enseñansa ta mi prioridad y mi unico agenda

ORANJESTAD – “Trankilidad den enseñansa ta mi prioridad y mi unico agenda” Palabranan di prome minister Evelyn Wever awe tardi. Den entrevista exclusive cu Noticia Cla Premier Evelyn Wever-Croes a duna di conoce cu su prioridad ta trankilidad den enseñansa pa nos muchanan por recupera e tres luna di les cu nan a perde y pa brinda tur mucha oportunidad igual den ensenjansa. “Esey ta mi unico agenda”. 

CARTA 

Pesey e prome minister di Aruba a manda un carta pa sindicato y directiva di scolnan y a invita sindicato SIMAR mesora pa un reunion diahuebs 18 juni 2020. Esaki tabata segun e mandatario e momento mas liher cu por a duna nan un cita, den e agenda hopi ocupa di e mandatario durante e crisis. Unico cos cu e mandatario a pidi SIMAR ta pa para tur accion en bista di dialogo cu e prome minister di e pais aki. 

DIALOGO Y ACCION

Noticia Cla a puntra e mandatario si awor cu SIMAR a anuncia accion diaranson merdia, si esaki ta stroba e dialogo di diahuebs. “Mi a duna SIMAR oido semper cu nan a pidi, mi a hasi hopi esfuerso cada bes cu nan a pidi mi atencion, hasta luna pasa un dia despues cu mi a dera mi subrina cu tabata algo hopi hopi duro pami. Awor mi ta pidi SIMAR un cos, para accion pa nos dialoga. Mi ta conta cu SIMAR ta para nan accion si nan ta realmente interesa den dialogo. Ami ta un agenda mi tin: bienestar di maestro y alumnonan” Evelyn Wever-Croes a finalisa bisando.