Docentenan rabia ta marcha diaranson pa Bestuurskantoor

ORANJESTAD – Diaranson atardi docentenan miembro (y no miembro) di sindicato di maestro Simar, lo participa den un marcha pasivo direccion Bestuurskantoor. A cancela e accion pa diaranson mainta tambe, presidente di e sindicato Josephine Albertus a bisa noticiacla.com. Pues ta mustra cu no obstante un carta di gobierno diamars mainta di prome minister Evelyn Wever na docentenan, e no a trece e claridad necesario manera tabata e intencion. Por lo menos no segun presidente di sindicato SIMAR, Josephine Albertus. 

CARTA SIN CLARIDAD 

Den un reaccion na noticiacla.com, e ta mustra cu tin varios cos cu no obstante e carta, ta keda dudoso. “Nan (docentenan) kier gewoon duidelijkheid y esey nan no a haya den e carta di minpres awe”  Albertus a bisa. 

DIALOGA

E peticion di docentenan pa minister anula e ‘intentieverklaring nan’ como tal, no a tuma lugar. Ta papia solamente di dialoga 12 luna. Ademas e carta ta bisa cu ainda scol Paso Pa Futuro tin cu muda. “Y den e carta di minister no ta bisa cu e mudansa di paso pa futuro no ta bay door. Ta bisa solamente cu e fusering di scol Paso pa Futuro cu Emmaschool no ta bay door” Albertus a bisa. Y pa Colegio San Nicolas, nan tabata bezig ainda, pues esaki no tabata cla  tampoco.   

REACCION MINISTER

Un di esnan cu a reacciona mas tempran riba e decision di sindicato SIMAR pa protesta (marcha) tabata minister Dangui Oduber. El a vocifera su mal contento riba su pagina di Facebook y a comparti esaki cu noticiacla.com.  “ Ta parce realmente cu senjora di Simar no ta of no kier compronde kiko Covid-19 a haci cu mundo y Aruba” e mandatario ta cuminsa bisa.  “Tur dia pa nos na Aruba ta un crisis pa nos tur. Miles di hende no tin trabou, cientos di comerciante a cera nan negoshi, tur luna gobierno mester pidi sosten financiero  na Hulanda pa e pais aki no crash anto comosifuera poco tur dia Simar kier manifesta”. E mandatario ta pidi e lider sindical pa ‘ sea contento, sea agradecido cu abo si tin pan riba mes pa bo famia. No sea tan destructivo! Mas negativismo y instigacion no lo yuda saca nos for di e crisis aki.   Busca manera pa duna bo contribucion positivo na bo pais enbez cu bo ta sigui destrui un pais cu ta kibra na pida pida caba! Bo ta un educador y no un disruptor!” e mandatario a finalisa bisando.