Sindicato di polis rabia cu gobierno y ley pa reduci salario

ORANJESTAD – Miembronan y presidente di sindicato di polis SPA ta hopi rabia riba gobierno pa e forma con nan ta sinti cu a trata nan. Diamars atardi durante un conferencia di prensa urgente, nan a relata cu nan ta sinti cu gobierno a tuma nan haci riba e entrega di salario. Diaranson merdia 1’or, nan lo tene un reunion di miembro riba Wilhelmina Park pa despues entrega un carta na Parlamento. E contenido di e carta ta mustra cu no kier pa pasa e concepto di ley cu ta regla e reduccion di salario. 

E SITUACION

Segun presidente di e sindicato Jose Dirksz, awor cu nan a haya e concepto di ley cu ta regla e reduccion di salario relaciona cu COVID-19, cu esaki tin puntonan aden cu no ta acceptable. Entre nan e articulo 7 cu ta regla cu gobierno por, usando e LB Ham, aumenta e porcentahe di reduccion di salario, sin tin cu pasa parlamento. Esaki sigur e sindicato lo no acepta. Ademas, mientras cu ta papia di dialoga, tur e tempo gobierno tabata sa cu e porcentahe final tabata fiha caba, te cu nan a pone den un ley. A invita e sindicato pa un reunion diaranson 3’or, pero no ta mira esaki mucho positivo. Sigur no di despues cu a haya invitacion siman pasa di gobierno pa atende e carta cu nan a manda pa no corta for di bezoldiging, gobierno a reuni cu e sindicatonan, y a medio purba ‘dividi’ nan. Segun Dirksz, nan no a cay den e wega aki.

REUNION

Como tal, a dicidi cu conforme regla di ILO (International Labour Organization), nan lo tene un reunion general di miembro pa 1’or di merdia riba Wilhelmina Park unda cu nan lo brainstorm riba e tema. Despues nan lo cruza caya, y entrega Parlamento un carta unda cu ta pidi Parlamento pa no pasa e ley aki. Mientras cu e ta wordo yama un ‘reunion’, e ta wordo considera como un tipo di accion disimula. Polisnan pues ta rabia y lo demonstra esey mayan (diaranson) merdia. Wak e concepto di ley AKI