Encuesta: Scucha radio mainta ta preferi y den auto mas hopi

Posted on 6/16/2020, 3:58 PM AST | Updated on 6/16/2020, 6:21 PM AST

ORANJESTAD – Mayoria di esnan encuesta entre lesadornan di noticiacla (1470), ta scucha radio mainta, ta prefera musica, y no ta importa si ta via radio tradicional of via internet. Otro data interesante ta cu mayoria hende ta scucha radio ora cu nan ta den auto. Y entre esnan cu a participa, e radionan cu mas nan ta scucha ta Canal 90FM, Top FM y Bo Guia FM. E encuesta a inicia diasabra merdia y a termina awe (diamars merdia). Un total di 1470 persona a participa, di cual e grupo cu mas a participa ta homber, y e grupo di edad mas grandi tabata entre 45 y 54 aña di edad. Y e grupo minoritario (4.3%) no ta scucha radio. 

MUSICA RIBA TUR COS

Loke ta resalta ta cu mayoria (86.30%) ta prefera pa scucha musica, sigui pa noticia (59.65%), y despues programanan educativo (talk shows of algo otro tematico), (28,.29%). No ta importa si ta transmiti via internet of no, y e mayoria (47.75%) ta scucha tur dos, sigui pa esun tradicional (46.14) y e grupo cu ta scucha solamente via internet ta apenas 6.11%. 

KI ORA TA SCUCHA RADIO

Mas data cu tabata interesante, ta ki ora e lectornan ta scucha radio mas tanto. E grupo mas grandi ta prefera scucha radio den oranan di mainta (36.45%), sigui pa merdia (26.08%) y despues atardi (23.89%). Un grupo hopi chikito (7.4%) ta scucha radio anochi. E grupo cu tin radio cendi henter dia ta 22.39%), y un otro grupo (22.05%) ta scucha dependiendo kico tin na radio. 

 

MAINTA VERSUS MERDIA

Esnan cu ta scucha radio mainta, ta prefera scucha musica (69.83%), sigui pa e grupo cu ta scucha noticia (26.63%), y un grupo hopi mas chikito ta scucha pueblo na palabra (3.55%). Esnan cu ta scucha merdia, ta prefera pa scucha musica tambe (51.26%), sigui pa noticia (42.54%) y despues pueblo na palabra (6.2%). Pues e grupo cu a participa, no ta gusta scucha pueblo na palabra masha hopi for di e cifranan colecta. 

NIVEL DI LOCUTOR

Un discusion cu tin hopi ta e nivel di locutor na Aruba. Si antes tabatin mas control riba esey, awe tin e impression cu ‘ken cu ta’ por traha na radio. E factor economico tambe ta hunga un rol hopi den esaki. Aki, sinembargo mayoria a aproba e nivel di e locutor na radio unda cu 45.45% ta haya cu e nivel di e locutor en general ta ‘bon’. Pero net su tras, tin e grupo cu ta haya e nivel ‘malo’ (26.27%). Tin ta haya e nivel hopi malo (13.78%) mientras cu un grupo mas chikito (10.22%) ta haya e nivel hopi bon. Tin un grupo aun mas chikito (4.31%) ta haya e nivel ‘perfecto’. Pega na esaki, tin e pregunta cu si mester bin un codigo di conducta pa locutornan na Aruba. Aki por a bisa si of no. E grupo mayoritario a bisa si (88.67%) mientras cu un grupo chikito (11.33%) a bisa cu no mester.

 

E RADIO MAS SCUCHA

Oficialmente Aruba tin 19 radio emisora activo registra na Directie Telecomunicatie Zaken (DTZ). Entre nan, esnan cu a participa na e encuesta, a saca nan radio preferi. Mester bisa si cu aki por a scohe mas cu un, ya cu bo por tin mas cu un faborito. Asina mes, obviamente tin cu a haya mas cu otro. Noticiacla.com ta raporta den e articulo aki e top 10, pero tin e grafico di tur cu a participa y nan porcentahe.  Wak e lista completo AKI.

Canal 90 FM   482 (32.77%) Top FM           426 (29.14%) Bo Guia FM    385 (26.33%) Cool FM          343 (23.46%) Power FM       333 (22.78%) Easy FM         289 (19.77%) Magic FM       281 (19.22%) Hits 100 FM   253 (17.31%) Galactica FM 252 (17.24%) FreshFM 223 (15.25%)