Maduro: Otro sindicato(nan) no kier compronde diferencia cu ABV

ORANJESTAD – No ta awor sino for di april caba trahadonan den cuido medico a entrega parti di nan salario. Asina presidente di e sindicato ABV (  Arubaanse Bond van werknemers in Verplegende Instellingen) Gina Maduro a bisa durante nan prome conferencia di prensa riba e tema, desde cu a surgi un ‘guera’ entre nan y sindicato di polis SPA. Sindicato SPA den fin di siman a protesta (welga) debi cu ABV lo a ‘broma’ cu nan si no tin cu entrega nada. Segun Maduro, e problema ta cu sindicato SPA no kier compronde y acepta e diferencia di structura cu tin entre nan. 

KICO A PASA

Segun Maduro, tur sindicato tabata bezig cu gobierno riba e tema di reduccion di salario. Problema segun Maduro, ta e diferencia di condicionan laboral cu miembronan di ABV no tin compara cu otro sindicatonan. “E ora logicamente nos a bisa gobierno cu nos no ta ambtenaar. Nos ta sector priva. Nos tin cu sinta cu cada dunado di trabou apart, pasobra nos tin cu CAO (Contracto di labor colectivo)” Maduro a sigui splica. Pesey nan a bay dos reunion so y e otro sindicatonan (trahadonan publico) a sigui cu nan palabracionan. Segun Maduro, mientras cu otro sindicatonan tabata tene accion, ABV tabata sinta dialoga na mesa cu nan respectivo doñonan di trabou. 

DEALNAN CERA

De hecho, Maduro a cuminsa na splica cu durante negosacionan, a regla cu cada doño di trabou, con ta reduci e entrada. A menciona entre otro con na cas di cuido di grandinan SABA, a yega na areglo pa reduci gastonan operacional, sin mishi cu salario y beneficio. Ta solamente bonus di augustus y November lo no keda paga. Pero tur otro salario ta keda intacto. E cambionan hunto, ta logra reduci 12.5% di entrada di e trahadonan. Tambe IMSAN, a logra cu ta reduci gastonan operacionak pero no ta mishi cu salario. Na Respaldo, tambe a logra mescos, esta reduci gastonan operacional y no mishi cu salario, pero si ta corta den vacantie uitkering. A mustra cu hospital tabata dificil, pero tambe a logra cierto cambionan, diferente cu sector publico. Ademas, segun Maduro, ta for di april a entrega 5%. Pues no ta awor sino basta tempo caba. 

KEN TA FRONTLINER

Segun Maduro, polis ta compronde e situacion robez. Nan no ta frontliners segun e presidente di e sindicato. Polis ta first responders. E ta un diferencia, unda cu esey ta ambulance, bombero y polis. Front liners ta ora cu bo yega Hospital. A enfoca riba estudio largo cu tin pa bira un enfermero, y bo mester di esaki, prome cu bo yama bo mes un frontliner.