Cu apertura di frontera awe, a conoce e normal ‘nobo’ di bula localmente

ORANJESTAD – Mientras cu frontera entre islanan ABC a habri dialuna, e interes parce no tabata mucho grandi. Pero si e tabata grandi mes, no mucho opcion pa bula, y esaki tambe a keda un realidad. E unico aeroliña cu a bula  dialuna entre islanan ABC, (2 biaha) tabata Divi Divi Air, y nan a bula ‘solamente’ entre Aruba y Corsou. E ultimo buelo dialuna atardi, tabatin apenas 3 persona a bordo. Mientras cu practicamente no tabatin pasahero, asina mes e facilidadnan Quiznos y Segafredo si a opta pa habri y duna servicio. Nan pues tabata e unico dos lugarnan cu a opta pa si habri, pa duna servicio na e pasaheronan.  

E NORMAL NOBO

Manera ta conoci, aeropuerto a cuminsa duna servicio bek na pasaheronan comercial awor cu a habri frontera. Y manera por a mira, a tuma e medidanan necesario pa cu e normal nobo. Pasaheronan a nota esaki tambe, unda cu den e sala di espera, tabatin asientonan marca pa no sinta, y na avion, tabata pidi pasaheronan pa limpia nan man, y tabata bisti mondkapje. Paden den aeropuerto, a nota cu e tabata estilo ‘ghost town’, ya cu no tabatin practicamente hende. Esaki ta algo comprendibel si mira cu ta apenas 2 buelo cu avion chikito tin, y cu no tin e fluho di pasahero normal. Pues den un aeropuerto asina grandi, e ta mustra hopi keto cu poco pasahero asina. Di otro banda, e ta un bon forma pa e personal completo repasa nan plan y protocol y wak unda mester ahusta pa ora habri frontera mas amplio entrante 1 di juli 2020.