Wever Croes: ‘No tin un problema cu Aruba tin awor, cu si nos bira municipio, e ta soluciona’

ORANJESTAD – Si Aruba bira un municipio di Hulanda ta nifica cu nos ta haya un solucion pa nos problemanan financiero, nos por evalu’e. Asina minister presidente Evelyn Wever a contesta riba e pregunta si Aruba mester bira un municipio (gemeente) di Hulanda of no. Tin un grito den comunidad cu ta pidi pa esaki, pues pa Aruba bira un municipio. “No tin un problema cu Aruba tin awor, cu si nos bira municipio, ta soluciona” Wever Croes a sigui bisa. Segun e mandatario, aworaki nos prioridad ta pa habri nos fronteranan bek pa por cuminsa desaroya nos economia. “Si nos bira municipio, nos no mester haci esey?” Wever a puntra. “Si bira municipio ta scapa nos awor di e problemanan cu nos ta aden, bo por papia di dje. Pero na mi parecer, no tin”, Wever a finalisa bisando. 

PAKICO MUNICIPIO

E grito pa Aruba bira un municipio ta di ultimo tempo cu a mira lanta cabez atrobe. Ta di e.o. ciudadano Atan Lee, cu tin un grupo cu ta buscando firma y sosten pa convence Hulanda pa nos bira un municipio. Un di e puntonan ta cu Aruba lo tin p.e. menos corupcion y cos lo cana mucho mas miho pa nos isla, si Aruba cay bou di Hulanda. E pensamento den comunidad ta dividi, y ultimo encuestanan haci, ta mustra un variacion di comentario. E isla, parce ta dividi riba e tema. Y hopi ta pensa cu aworaki no ta e momento di pensa riba esaki. Tin ta mira Bonaire como ehempel, unda cu ta kere cu (bayendo tras di ciudadanonan di e isla), cu esaki ta e pio cu por a pasa cu e isla. Otronan ta mustra cu for di momento cu Bonaire a conoce e cambio na 10-10-10, esaki a bay solamente pa miho.