Koopmans: Serlimar ta bringa tur dia pa tene cabez riba awa

ORANJESTAD – Serlimar ta bringando tur dia pa tene su cabez riba awa. Asina por a compronde di e director nobo Anko Koopmans, durante un conferencia di prensa di Serlimar dialuna atardi. Aki e minister en cuestion Marisol Lopez Tromp a bisa cu e ta compronde e preocupacion di e trahadonan, pero cu no tabatin motibo pa un accion siman pasa, pasobra ‘no tabatin un conflicto laboral’. Bek pa e director, el a bisa cu e ta compronde e preocupacion di e trahadonan pasobra enberdad ta hopi inseguridad tin e temponan aki. 

GASTONAN

E compania ta ricibi tur luna 2 miyon na entrada y tin 3 miyon na gasto segun Koopmans. Pues structuralmente tur luna tin un deficit cu e tin cu lucha cu ne. Y tur luna e tin cu dicidi ken ta wordo paga e luna ey y ken no. Y tur luna ta duna un otro chens. E surseance van betaling (proteccion contra creditornan) tabata necesario, pa asina e por tin un espacio pa hala rosea y restructura e compania financieramente. Cu e surseance van betaling, ta nifica cu enbez di paga su creditornan tur luna, e por paga otro debenan di operacion cu e tin pa asina sali for di e situacion precario. E no ta un situacion facil, debi cu awor cu tin un ‘bewindvoerder’ cu ta controla tur aspecto financiero, e (director) tin cu check hasta lo minimo di gasto, pa aprobacion prome cu por paga. Gobierno debe Serlimar hopi placa, y esey ta un di e problemanan cu tin. Tin un debe di por lo menos 70 miyon riba caya, cu ainda no tin fin di drenta. Tambe tin placa cu Parlamento a aproba (6 miyon of mas) cu nunca a yega Serlimar. Esey ta pone cu cosnan no ta nada bon. 

SALARIO

A mustra cu si cos no drecha liher, pa fin di otro luna no por paga salario di trahadonan. E luna aki tin un grupo cu lo haya salario y tin un grupo no. Ta trata di varios grupo y rango di persona cu tin diferente rato di pago. Y aki ta depende ken ta keda sin haya pago e luna aki.