Lopez Tromp ta sigui traha normal, pendiente e mediacion cu POR

ORANJESTAD – Marisol Lopez Tromp dialuna a bisa noticiacla.com cu e ta sigui traha normal como minister. E la confirma tambe cu partido POR a anuncia un proceso di mediacion, y e ta na altura di esaki. E ta warda esaki tuma lugar y ta wak con ta bay cu esey. E ta recorda cu recientemente durante su ultimo conferencia riba e tema, cu el a bisa e momento ey cu e ta keda semper habri pa papia. Mientrastanto, e ta sigui atende cu su cosnan como minister. E la bolbe recorda e portal aki cu e ta sigui pensa cu e no a haci nada malo pa cual e ta haya cu e mester retira. Dialuna a haci un siman cu e ultimatum duna pa e partido, pa Lopez Tromp entrega su retiro como minister. E ultimatum a yega y bay, y Lopez Tromp a opta pa no retira y sigui traha normal. 

REACCION GOBIERNO

Dialuna mainta tambe prome minister Evelyn Wever Croes a reacciona riba e tema aki. “Nos ta na mesun lugar” Wever Croes a bisa, indicando cu no tin novedad. “Siman pasa mi a pidi ambos partido, ambos banda, pa dialoga y purba sali afo, pasobra e pais aki ta den crisis y nos no mester aworaki un crisis politico” Wever Croes a sigui bisa. “Te eynan ma lagele tambe y mi mes no a haya un update di e situacion” Wever Croes a finalisa bisando. 

DIALOGO

Tabata despues di algun dia cu no a tende nada di partido POR, despues cu e ultimatum a vence, cu nan a anuncia cu a instala un comision pa mediacion riba e tema, basa riba e interes general cu mester prevalece aworaki, mirando e crisis cu nos ta aden. E portal aki a compronde cu e peticion official a bin di parti di prome minister Wever, riba cual e lider (interino) Andin Bikker mas bien lo a reacciona y actua ariba. Pero awor, ta compronde di Lopez Tromp cu e mediation no a cuminsa y cu tin cu warda wak kico ta sali afo. E posibilidadnan ta cu partidonan ta cera paz cu otro, y ta sigui nan rumbo hunto. Esaki aunke cu tin heridanan cu ta keda habri entre e partidonan. Tin tambe e posibilidad cu partido ta sigui cu su intencion di pidi un mocion di desconfiansa contra Lopez Tromp, pa cual por bah’e. Si esey sosode, lo bin un otro persona na lugar di Lopez Tromp. Si e sobrevivi e voto di desconfiansa, POR por opta pa retira nan sosten na e gabinete, cu ta nifica cu e gabinete ta cay y ta bin eleccion dentro di tres luna. Algo cu aworaki, no ta na bienestar di nos pais.