Lopez Tromp: Suma cu mester paga Serlimar pa piki sushi, no ta realistico

ORANJESTAD – E suma cu Serlimar mester cobra su usuarionan no ta realistico. Asina minister Marisol Lopez Tromp a contesta noticiacla.com dialuna durante e conferencia di prensa riba e compania. A puntra e mandatario si e ley controversial conoci como ‘Ley di Serlimar’ ta bay pasa ainda y si esey por resolve e problema di likidez di e compania. E ley mester a ancra e proceso di cobransa y mas asunto, pero  e ley nunca no a pasa mas despues cu e ex minister Otmar Oduber a retira. Unabez cu tur e puntonan pa e ley ta cla, lo atende cu esaki. Pero e mandatario a subraya cu e suma, lo mester cambia. 

E SUMA

E suma cu Serlimar mester cobra, a keda estableci na 25 florin, pero segun Lopez Tromp, esaki no ta un suma ‘realistico’. Esaki pasobra ni si tur hende paga e suma, cu ta suppose di paga esaki, e lo no saca Serlimar for di e debe financiero cu e ta aden. Esey ta pasobra e suma ta hopi mas. Berdad por tene e suma ‘abou’, pa asina yuda e pueblo, pero e realidad ta cu e no ta yuda e compania y ta stroba e compania di yena su buraconan financiero. E mandatario a indica cu e suma lo mester ta mas cu 25 florin, pero ta expertonan di e compania lo tin cu determina e suma cu ta uno mas realistico. 

E LEY

E ley por lo pronto lo no yega Parlamento pasobra tin varios cos ainda pendiente cu ta trahando ariba. Entre nan e business plan cu mester a cuminsa full di nobo ora cu e director nobo a cuminsa traha. Tambe tin otro aspectonan cu no ta cla cu ta trahando ariba, pa asina tur cos di e ley ta completo. Unabez cu esey ta cla, por bolbe pasa e ley pa Parlamento pa asina purba pasa esaki e biaha aki si. E ley mester a wordo pasa for di December aña pasa pero a keda para pasobra Parlamento no por a haya suficiente voto entre su miembronan di coalicion pa pasa e ley. E awor ex mandatario a baha e tempo ey despues, y nunca mas e ley no a wordo pasa.