Oduber: A logra corta suficiente den AZV pa cumpli cu exigencia di Hulanda

ORANJESTAD – AZV a logra corta suficiente pa spaar 5 miyon mensual exigi di Hulanda. Asina minister Dangui Oduber, responsabel pa AZV a bisa dialuna mainta durante e conferencia di prensa di gobierno. Esaki ta inclui cu entrante 1 di juni 2020 AZV ta reduci daggeld pa pashent cu wordo manda den exterior, cu 50%. Ademas, personanan cu ta compaña e pashent, no ta haya daggeld mas di AZV.   E lista di medida, segun Oduber, ta suficiente pues pa garantisa e reduccion di 35 miyon total cu Hulanda ta exigi.

E MEDIDANAN

E prome medida anuncia, de hecho no ta algo cu ta obligatorio di AZV, sino a duna esaki tur e tempo, cu a bira custumber. Awor ta reduci e daggeld pa pashent cu 50%, y ta kita esun di e acompañante completo. AZV lo sigui paga pasashi parcial di cu ta acompaña e pashent ta wordo cubri, pero e persona tin cu cubri 300 florin di e ticket, (eigen risico). Transporte pa pashent den rolstoel of bedliggend y cu tin cu bay dialyse, ta keda cubri. E grupo vulnerable cu no tin manera pa paga transporte of no tin transporte, lo bin un ‘zorgtoeslag’, pasobra e principio tabata pa esnan mas vulnerable no wordo afecta. E ta trata di un grupo di 33 di e 100 pashentnan cu mester di transporte. Esnan cu tin transporte, nan mes lo tin cu regla esaki. 

ZORGAANBIEDERS

Esnan cu ta ofrece cuido (zorgaanbieders) na comunidad, lo haya un 'inkorting' di 5.5% riba nan presupuesto. Hunto, tur esaki ta cumpli cu e lista di medida pa corta gasto di AZV.