Frontera entre islanan ABC a habri cu coneccion aereo limita

ORANJESTAD – Mientras cu frontera entre Aruba, Bonaire y Corsou ta habri bek awe (dialuna, 15 di juni 2020), no tur aeroliña ta disponibel. Entre nan tin uno importante cu ta Aruba Airlines, cu ta cuminsa bula te 29 di juni proximo. Esaki pasobra segun nan informacion, a haya informacion di reapertura laat. Otro aeroliñanan cu a anuncia nan operacion ta Divi Divi Air y EZ Air, cu ta cuminsa bula awor. Win Air, eventualmente lo cuminsa bula otro luna. Segun informacion cu aeropuerto di Aruba a suministra, Divi Divi Air lo ta bulando 14 biaha pa Corsou. Riba e website di Divi Divi Air tin por lo menos un buelo pa dia, y algun dia te hasta dos. E prome buelo ta dialuna atardi for di Aruba pa Corsou. Ez Air sinembargo riba nan website no ta ofrece buelo ainda y e unico opcion tabata pa Bonaire.