Aruba Airlines ta cuminsa bula bek aki dos siman pa Corsou

ORANJESTAD – Mientras cu frontera entre islanan ABC a habri dialuna (awe), Aruba Airlines lo no cuminsa bula ainda sino te 29 di juni proximo.   Asina a director di operacion Frank Arendsz a bisa noticiacla.com dialuna mainta. E motibo ta cu nan a haya e notificacion di reapertura laat y ta den preparacion pa inicia nan buelonan entrante 29 di juni proximo. E intencion ta pa ora cu nan bula, esaki lo inicia cu 4 buelo pa siman, cu ta dialuna, diaranson, diabierna y diadomingo. Tur ta buelonan pa Corsou. A sigura cu lo tin paketenan di promocion pa haci atractivo pa asina incentiva e pasaheronan pa cuminsa bula atrobe. Ora cu a haya e anuncio, Aruba Airlines tabata den preparacion y a tuma 3 siman pa por inicia cu su operacion. Fuera di Aruba Airlines, tin otro aeroliñanan cu si ta bulando.