Minister ta desmenti cu scolnan di San Nicolas lo no ta publico mas

ORANJESTAD – Dialuna mainta, minister di enseñansa Rudy Lampe a manda un comunicado, pa desmenti cu scolnan na San Nicolas lo stop di ta publico. E mandatario ta referi na su conferencia di prensa di diahuebs siman pasa, aunke e intencion ta pa trankilisa docentenan cu a bay den accion dialuna mainta. 

CONFERENCIA

Segun Lampe, Gobierno na niun momento tawata tin e intencion pa cera e scolnan publico na San Nicolas y den e ‘intentie verklaring’ a ser poni un clausula cu tanto SPCOA y Fundacion Educacion combina lo mantene nan “openbaar karakter”. “Di comienso a ser bisa cu no lo cera scolnan publico pues e demanda di SIMAR ta algo incomprendibel ya cu e topico aki nunca tawata riba mesa”, e mandatario ta sigui bisa. 

MAL INFORMACION

Segun Lampe, e informacionnan cu a ser duna desde inicio publicamente ta cu e scolnan ey ta mantene nan caracter publico. Ta incomprendibel dicon ta keda duna mal informacion na comunidad siendo cu e informacion corecto a sali publicamente caba door di Minister di Enseñanza. 

CAMBIO

Lampe tambe a referi na e cambio cu mester a haci pa motibo cu e carta cu a ser manda na unda ta splica cu ta bay tuma un aña pa dialoga no tawata “match” cierto palabranan den e ministeriele beschikking (MB). Pa e motibo aki mester a trece cambio den e MB pa asina nan por ta igual. E MB cambia a wordo manda pa SIMAR manera palabra.

SOLICITATIE

Finalmente Minister Lampe a menciona cu a ser habri e solicitatie pa e management team di Colegio San Nicolas na unda cu e maestronan tawata tin un siman pa solicita. Desafortunadamente ningun maestro a solicita. Gobierno a habri e posibilidad pa docentenan di San Nicolas por ta parti di e management team pero no tawata tin niun interesado. Pa e motibo aworaki a habri e solicitatie pa intersadonan di pafo. Mester bisa cu mes momento cu e conferencia tabata tuma lugar, docentenan di CSN a sigura e portal aki cu e loke cu e minister a bisa riba e solicitud, no ta berdad, y cu cos no a bay manera e mandatario ta pretende. Minister mientrastanto ta sigui bisa cu e informacionnan cu ta ser duna no ta corecto ya cu e scolnan publico ta keda publico.