Hopi scol na Aruba a bay den accion dialuna pa dos ora

ORANJESTAD – Varios scol dialuna mainta a lanta cera, como protesta y e informacion cu nan lo habri te 9’or y mei di mainta, envez di e orario regular. Cu esaki nan ta confirma e informacion di noticiacla.com di diadomingo, cu ‘varios scol lo lanta den accion na comienso di siman. Na San Nicolas tabatin scolnan manera Abraham de Veer,Commandeur Pieter Boer y Prins Bernard cu a informa cu e scol lo cuminsa 2 ora mas laat (9:30am). Emma school, Pius X, Conrado Coronel y EPI tambe a informa cu nan ta den accion. 

PAKICO ACCION

E accion tabata debi an preocupacion di e docentenan di e futuro di enseñansa, pa cual a mustra nan descontento. “ Nos tin mas cu un aña ta mustra na diferente manera nos malcontento den enseñansa” SIMAR ta bisa.” Siman pasa atrobe nos a mustra cu un #protestapasivo y e siman aki nos ta cuminsa cu un protesta di 2 ora. Nos sa cu esaki ta trece algun turbulencia den boso mainta pero nos ta bringando pa nos isla su futuro...pa nos scol, pa nos muchanan y pa nos derechonan.. aki algun di e tantisimo puntonan pakiko awe nos ta dicidi di pone trabou plat pa 2 ora.. un biaha mas..masha danki pa boso comprension” ta e mensahe cu e docentenan a manda pa mayornan. 

PROBLEMA

Como problemanan, a cita por lo menos 5 asunto cu ta conoci caba, di cual e prome menciona ta cu otro aña San Nicolas lo no tin scol publico. Mester bisa cu esaki a keda contradeci si dialuna mainta via un comunicado di gobierno (lesa: Minister Rudy Lampe). Tambe cu Commandeur Pieter Boer School lo cay bou di SPCOA. Ademas cu lo no mag inscribi mucha pa kleuterschool, dus ta perhudica e scol den su existencia. Tambe otro scol, Abraham de Veer (DPS) tin cu cay bou di SPCOA. SPCOA mag di haci y deshaci cu e scolnan. Y cu  Colegio San Nicolas tin cu cay bou di De Schakel. Prome minister di Aruba Evelyn Wever Croes a informa sinembargo cu esaki lo no sosode. Pero e docentenan no ta kere esaki. 

POSICION HURIDICO

E posicion huridico di e docentenan tambe ta wordo cuestiona segun SIMAR. Nan ta referi “ na manera di e entrega di 5% via basisbezoldiging tot nader orde unda cu lo tin pensioen afbouw. Nos kier ta solidario pero na un forma corecto mescos cu empleadonan di AZV por ehempel”. No ta descarta cu lo por intensiva e accion di docentenan den e dianan cu ta sigui.