SIMAR: Siman lo habri cu varios accion di docentenan disgusta

ORANJESTAD – E siman entrante docentenan miembro di sindicato SIMAR lo cuminsa cu accionan pa protesta e situacion actual den enseñansa. Asina presidente di e sindicato  Josephine Albertus a confirma pa noticiacla.com diadomingo anochi. “Maestronan ta disgusta. Lo tin diferente accion den e siman aki” Albertus a bisa. Mas e no tabata por a bisa. Mas principal, e disgusto ta cu e maneho di gobierno  (lesa:minister Rudy Lampe), cu tur e decisionan unilateral. “Docentenan ta demotiva y e siman aki nan lo sali cu accion”. 

DIALOGA

No obstante e promesa siman pasa di minister Lampe cu e lo dialoga y cu e lo a dialoga caba, SIMAR a sigui bisa diadomingo anochi durante nan reunion urgente. “E la priminti cu lo bin un addendum. Ainda nan ta warda”. E minister lo ta sigui insisti cu kier saca Scol Paso Pa Futuro (SPPF) di e edificio di ex Materdei y mande parti na Santa Cruz SPO y parti na Seroe Blanco. Y na SPO Santa Cruz tin cu bay saca alumno di nan scol pa por hinca alumnonan di SPPF, Albertus a sigui bisa. “Minister presidente a bisa cu tur cos lo para, pero minister di enseñansa ta sigui toch (cu su plannan)” e presidente a sigui bisa. Y asina tin un sin fin di cos mas cu lo tin nan preocupa. Como tal, a dicidi diadomingo cu e siman entrante lo inicia cu varios tipo di accion.