Drive-thru pa number di auto a bay bon pero hopi automobilista no a presenta

ORANJESTAD – E cantidad di automobilista cu mester a bin busca nan plachi di number di auto e weekend aki, no tabata hopi. Aunke e departamento di impuesto a haci tur intento pa logra pa por parti 6000 number (inicialmente esaki tabata 4000), diadomingo segun calculacion di e departamento, a reparti apenas algo mas cu 1000 plachi. Esaki segun director di DIMP Luenne Gomez Pieters na noticiacla diadomingo. Un dia prome, a atende por lo menos 600 auto, pero tabatin varios automobilista cu a bin busca mas cu un plachi. Pues e cantidad por ta mas. E comentarionan di esnan cu a bin, si tabata positivo. Esnan cu si a bin, tabatin palabra di elogio so. Tanto diasabra como diadomingo, tabata tarda un automobilista entre 20 pa 30 minuut for di ora cu e yega den e fila riba avenida Milio Croes, te ora e ricibi e plachi den su man.  

E SITUACION

E operacion mes tabata un exito rotundo segun Gomez a splica caba durante un conferencia di prensa diasabra atardi. E tabata asina exitoso, cu a dicidi cu enbez di reparti solamente 2000 plachi pa dia, a doble esaki y a laga pa 4000 plachi keda parti. Y a anuncia mesora tambe cu pa diadomingo (awe) lo a bay te 6000. E operacion a mustra cu nan lo por a maneha e aumento di plachi pa cual a dicidi pa haci cambio den e operacion. Lamentablemente e pueblo no a coopera, cu a pone cu hopi hende toch no a bin. Esaki ta nifica cu esnan cu no a bin, ta perde nan chens y nan tin cu bay wak otro forma con pa atende cu e plachi awor. Pa otro weekend, ta sigui segun schedule cu e siguiente cantidad, y por a compronde cu esaki lo ta 6001 pa 8000 of mas halto. Oficialmente lo informa di esaki den e siman cu ta bin.