Marisol Lopez Tromp ta minister ainda y situacion ta status quo

ORANJESTAD – Dialuna ta haci un siman cu e ‘deadline’ cu partido politico POR a pone pa su minister Marisol Lopez Tromp pa retira di e funcion. Esaki pasobra e mandatario no ta cumpliendo cu partido su forma di opera. E ultimatum poni tabata siman pasa dialuna 10’or di mainta. Lopez Tromp no a retira y a informa tambe pakico no. Mientrastanto un siman a pasa, y e ta keto bay minister. Partido POR a anuncia cu lo a bay inicia un mediacion pa asina wak si por ‘resolve’ e situacion interno. Pero publicamente POR no a laga sa nada mas, y Lopez Tromp ta trahando normalmente. De hecho el a presenta na e conseho di minister diabierna, normalmente. 

SITUACION

Noticiacla a haci hopi intento via canalnan official pa haya sa kico ta e situacion. Pero tur canal official, no ta bisando nada ‘oficialmente’. E unico informacion tabata e intento di mediacion. Pero despues a surgi un silencio hermetico. Internamente, inoficialmente sinembargo, e portal aki a compronde cu no ta mira mucho avanse den e mediacion, ya cu lo kier pa e emocionan ‘baha’ un poco prome. A compronde oficialmente cu e minister ta laborando normal, atendiendo reunionan normalmente tambe. E unico reunion cu e no a atende, tabata esun di siman pasa diahuebs cu sindicato riba e problema na Serlimar.

POSIBILIDADNAN

Mientrastanto, e portal aki a compronde cu tin reunionan importante cu mester wordo yama pa Parlamento referente e crisis di COVID-19 unda cu mester pasa cierto leynan, pa aproba cambionan pa cumpli cu e exigencianan di Hulanda pa por haya mas fondo. E problema ta cu asina cu un reunion wordo yama, tin e posibilidad pa partido POR entrega un mocion di desconfiansa contra e respectivo minister, pa cual parlamentarionan mester vota. Y si mayoria vota contra, (11), e ora e mandatario mester retira. Si e sobrevivi e mocion, ta keda na POR pa wak si nan ta sigui sostene e coalicion, of si nan ta retira nan sosten, cu consecuencia cu gobierno ta cay. Pero, ainda tin e chens di mediacion, unda cu partidonan por dicidi di cera paz, dera hacha y huma pipa di paz. A compronde inoficialmente si, cu e daño interno ta haci caba y no tin mucho confiansa dentro di e partido POR, pa cu e minister en cuestion. Con esaki ta bay funciona, no ta conoci. Tempo lo bisa. E holoshi sinembargo, ta canando, y ora cero ta yegando.