Wever: Gobierno ta lamenta accion di polisnan di diasabra anochi

ORANJESTAD – Despues cu sindicato di polis SPA diasabra anochi a yama un accion di 2 ora, gobierno di Aruba mesora a reacciona, desaprobando di e accion. Segun gobierno, sindicato di polis, sin tin informacion corecto, a dicidi di pone trabou abou y pone orden publico na riesgo. E motibo segun e polisnan ta cu e sindicato di trahadonan di hospital a bay ‘broma’ riba red social (Facebook) cu nan si no tin cu entrega salario y vacantie uitkering, mientras cu polis y otronan si. Gobierno a sigura pa medio di un comunicado, cu hospital su trahadonan tambe ta entrega. Di otro banda, a mustra tambe si cu no por compara polis cu ta ambtenaar, cu empleadonan di Hospital cu no ta ambtenaar y no tin tur e beneficionan primario ni secundario cu polisnan y demas empleadonan publico tin. 

DIFERENCIA

Gobierno a recorda e polisnan cu tin hopi diferencia entre e dos gruponan aki: salarionan, overtime, vakantie, ATV, indexering, back to school premie, bashi premie. Esaki ta e motibo cu Hulanda desde un tempo caba ta poniendo presion riba Gobierno di Aruba pa baha e gastonan di salario di e empleado publico. 

ENTREGA

Y ta pa e motibo aki Gobierno di Aruba mester a atende prome cu empleadonan publico mesora. Y a traves di e diferente fundacionnan Gobierno a atende e entrega di salario di empleadonan di institutonan semi-publico. Empleadonan di Hospital tambe ta entrega mescos cu ta wordo spera di tur trahado na instancianan publico y semi-publico na Aruba.

PETICION

“Nos pais ta den crisis awor y durante e crisis aki nos ta conta riba esnan cu mester mantene nos hendenan salud y sigur. Awor no ta e momento pa un accion asina. Un accion asina no tabata necesario si a simplemente puntra prome. Ademas, nos a haci un cita caba cu e sindicatonan pa reuni otro siman. 

Mi ta haci un apelacion riba un y tur pa nos laga sano huicio prevalece. E crisis aki a causa hopi dolor na hopi famia cu a perde tur cos. Ta pidi un aporte di 5% na unda otro trahadonan a perde hopi mas.

Mi ta conta cu nos por mustra cu nos ta un pueblo civilisa y solidario cu otro. Un cos si, orden publico mester wordo manteni y mi ta conta cu Cuerpo Policial lo carga su responsabilidad den esaki”, Minister President Evelyn Wever-Croes a duna di conoce na final.