Hopi hende a acudi na 'drive-thru' di DIMP pa number di auto

ORANJESTAD – Un liña largo di auto ambos direccion na altura di Dakota Shopping Paradise riba Avenida Milio Croes tabatin diasabra mainta, como parti di e servicio di drive-thru di servicio di impuesto pa busca nan plachi di number di auto. Esaki ta mustra e interes cu tin pa cu e proceso, segun director di DIMP Luenne Gomez Pieters a bisa noticiacla diasabra mainta. Manera raporta anteriormente, e intencion tabata pa entrega 2000 plachi pa dia (tanto riba diasabra y diadomingo), entre 9’or di mainta pa 3’or di a tardi. Gomez Pieters tabata hopi satisfecho con su 32 trahadonan a maneha e situacion y tambe cu e clientenan tabata contento. A combersa cu varios di nan y nan a mustra nan satisfaccion pa cu e posibilidad aki. Specialmente e grupo di hende di edad, no mester a para den rij den solo, sino por a keda den nan auto y warda esaki segun e liña tabata core. Por a nota cu tabatin dos post, uno pa controla seguro (na altura di e annex pa entrega plachi normalmente), y e otro mas pasuid riba parkinglot di e edificio di DIMP, unda cu tabata entrega e plachi mes. Tabatin suficiente guia riba e ruta pa asisti e automobilistanan, y tambe na momento di entrega e plachi. tabata durante entre 2 pa 4 minuut pa entrega e plachi, cu a bay bon segun usuarionan cu a papia cu e portal aki. Unico keho cu tabatin, ta e hecho cu tin hende cu tin dos pa tres auto, y e numbernan ta leu di otro. Esey ta pone cu nan mester bin dos pa tres biaha pa e mesun proceso, ya cu ta tuma solamente cierto cifra pa dia. Diasabra y diadomingo (awe y mayan) ta tuma entre 1 y 4000, y otro siman ta sigui di 4001 pa 6000. No ta conoci si DIMP lo por ahusta e proceso pa asisti esnan cu tin dos auto cu diferente number leu di otro.