Ex minister Bermudez: Elan den relashonan di Reino Hulandes

ORANJESTAD - Na ocacion di un buki nobo di Paul Comenencia jama ‘Reino dividi’, Raad van State a organisa un webinar pa discuti e tema aki cu un panel diabierna mainta. Un di e panelistanan tabata ex minister di Finanza pa Aruba Angel Bermudez. El a presenta e tema ‘Elan den Relacionan den Reino Hulandes. 

Segun Bermudez, COVID-19 mundialmente - mane un MRI – a illustra na un manera detaya bastante problematica economico, social, financiero y politico.

Entre nan tambe, e relacion seco cu ta reina entre e paisnan di Reino Hulandes; mas bien causa pa:

-        E escala chikito di e islanan Caribense;

-        E non-cumplimento structural di nan;

-        E deficit financiero economico cronico;

-        Dificultad pa aplica ‘good governance’

E escala chikito di e islanan Caribense no ta solamente geografico y demografico segun Bermudez

E ta un realidad cu ta reflaha constantemente:

-        E falta di suficiente experticio y competencia professional;

-        Ehecutivonan mediocre riba diferente nivel;

-        Aumento cresiendo di insuficiente fondonan financiero;

E debacle di ENRON rond aña 2000 a causa un codigo extenso pa comercio internacional financieramente  ta den ‘good standing’. 

Es decir, compila cuenta anual na tempo y confiabel, haci aangifte na tempo etc. 

Sinembargo na 2020 mayoria di e islanan Caribense structuralmente ta demonstra;

-        un cyclo di presupuesto retarda; 

-        atraso di cuentanan anual cu no ta aproba; 

-        falta di un maneho structural pa mehora finanzas publico;

-        falta di transparencia pa legitima decisionan tuma.

-        belastingdienst y aduana no ta funciona optimal pa falta di suficiente professional, bon equipo y leynan modernisa (LUID: 1908!).

Un vision integral pa henter Reino ta complica segun Bermudez, pa motibo di 7 cultura, 7 economia, 7 constelacion politico etc. Sin embargo, segun Bermudez  Hulanda por cuminsa yuda forma un vision pa e Reino Caribense, door di inicia pro-activamente algun proposicion di cooperacion entre e islanan. 

No mester adapta Statuut pa esaki segun Bermudez, pero cuminsa busca mutuamente synergianan pa tur!

Por ehemplo riba tereno di Salubridad Publiko: coordina programanan di prevencion tocante e problema  tipico Caribense di obesidad / hypertencia / diabetes. 

Esakinan ta demanda cuido medico caro, mientras e gastonan di cuido ta saliendo fo’i panchi. 

Tambe por pidi e hospitalnan di CASB palabra ken ta haci kico, pa evita speciliasmo dobbel. Cuminsa cu diagnosis y despues e cuido secundario. Asina por reduci e 100+miyon cu e islanan ta pagando Colombia tur aña!

Riba tereno di enseñanza, mester haci mescos segun Bermudez.   Mientras Aruba y Curacao tin hopi discusion den e tereno aki, enseñansa primario y secundario na Boneiro ta riba e nivel di Hulanda. Palabra cu Hulanda pa contempla e systema aki pa tur 6 isla.

Asina kada yiu di tera ta haña mesun calidad di educacion y esnan cu ta bai Hulanda pa sigui studia, tin e miho adaptacion igual ayanan.

E unversidadnan por coordina nan curriculum pa asina nan ta complementario na otro y evita dobbels.

Y pa loke ta legislacion, Bermudez ta haya cu por tin mas ‘concordancia’.

Por ehempel den leynan di impuesto. E ex mandatario di Finanza ta recorda cu tur isla ta cobra loonbelasting, inkomstenbelasting, omzetbelasting, vastgoedbelasting etc. Pero cada uno ta diferente. Mester unifica e leynan aki pa mas seguridad legal, mientras ku Raad van Beroep tin pa cada impuesto 1 ley pa cubri y no 4 pa Aruba, BES, Curacao, SXM.

Asina tambe por introduci un Algemene Rekenkamer pa e islanan cu ayudo di Hulanda, pa haci tur e cuentanan anual actual. Mescos ta conta pa e trafico aereo regular intercaribense!

Comparti experticio, competencia profesional y experiencia entre e islanan Caribense y ora logra, cualifica nan como tarea di Reino!

Pa trece mas elan den e relacionan di Reino, e islanan Caribense mester ta mas pro-activo y cooperativo. No mester adapta Statuut pa esaki, pasobra autonomia no ta stroba e actitud aki.

Ademas ‘status aparte’ no ta un exclusividad mas; 3 isla tin’e y tur 6 tin un forma di autonomia!

Finalmente, segun Bermudez, politiconan mester pone nan bista riba futuro. 

Na lugar di comparti cada bez e fayonan di pasado, comparti loke ta bon pa futuro di nos comunidadnan.

Covid-19 a pone hopi hende pensa kico mester bay miho y ta desea un shift di paradigma.

Mester ofrece nan e espacio pa discuti, investiga y concretisa tur e ideanan aki.

Finalmente, Hulanda mester honra esaki cu incentivo, na luga di bin cu exigensianan drastico.

Sostene e cambionan aki cu fondonan  necesario, experticio y ekipo, mientras e islanan di Reino ta haya e entusiasmo y energia pa conhuntamente move bai dilanti!