Corte a repasa 150 di su historia den relato anual 2019

Corte a repasa 150 di su historia den relato anual 2019

Posted on 06/12/2020 6:08 pm AST | Updated on 06/12/2020 7:05 pm AST

ORANJESTAD - Corte Comun di Husticia di Aruba, Corsou, Sint Maarten y di Boneiro, Sint Eustatius y Saba a presenta su relato anual di aña 2019 na publico. Den 2019 Corte a para keto di forma festivo na su 150 añanan di existencia, como un di e institucionnan mas bieu di Reino. Ta pa e motibo aki mes e relato anual a haya un tema cu ta pas cu e ocasion: 150 Aña Corte. Mescos cu añanan anterior, a traha e relato anual digital di forma interactivo, cu entrevista, sentencia y videonan cortico cu ta contene informacion adicional.

150 AÑA CORTE

Corte di Husticia ta situa pa 150 aña caba den e mahestuoso Stadhuis na Wilhelminaplein 4, na Corsou. Cu tempo el a bin haya un nomber mas aserca, esta: 21 Trapi. E nomber aki ta referi na e 21 stapnan cu ta conduci na e edificio. Den e relato anual Corte ta mira bek ariba con el a cuminsa na aña 1869, na momento cu, despues di keho di Gobernador De Rouville tocante administracion di husticia na e islanan, a lanta Corte. Tambe ta para keto ampliamente na e Simposio na honor di 150 aña di Corte. Tur cu a perde e simposio, por lesa discurso di e oradornan den e relato anual.

ADMINISTRACION DI HUSTICIA

Corte como organisacion a sirbi cu e estado di derecho den 2019 cu 43 hues y 136 colaborado den diferente funcion di asistencia.

CANTIDAD DI CASO

Den 2019 a drenta 39.189 caso den Corte di prome instancia, un subida leve di 5% compara cu 2018. E subida mas halto ta den area di derecho administrativo (‘bestuursrecht’), caminda tabata tin en total 2.301 caso, un subida di 24% compara cu e an?a prome. E casonan di LAR, ‘Landsverordening Administratieve Rechtspraak’, a bira dobel y tabata tin un subida pa loke ta trata casonan di stranhero debi na e situacion economico y politico na Venezuela.

Tin 38.903 caso cu a finalisa, esaki ta 4% mas cu e aña prome. Aki tambe por mira cu e subida mas substancial ta den e area di derecho administrativo (‘bestruursrecht’). Por mira e subida aki principalmente na Aruba y Corsou.

E total di casonan den apelacion cu a drenta den 2019 ta 1.327, esaki ta representa un bahada leve di 2% si nos compara cu 2018. E bahada mas substancial ta den casonan civil, casonan tocante labor y huicionan sumario. A finalisa un total di 1.123 caso den apelacion, esaki ta representa un subida di 20% compara cu 2018.

Ningun caso penal no a bini bek Corte

Cu orguyo Corte ta informa cu Corte Supremo di Husticia na Hulanda no a destrui, ni tampoco manda ningun caso penal bek pa Corte. Corte Supremo a trata un total di 33, asina yama ‘casonan penal di Caribe’, den cual ya caba tabata tin un sentencia di Corte den apelacion.

HUESNAN LOCAL

Den 2019 tabata tin tres hues den trayecto di formacion na Corte. Dos di nan, Kimberly Lasten y Angeline Martijn a termina e trayecto aki di forma exitoso na 2019 y a keda nombra como miembro di Corte, sede Corsou. Nan a instala na september 2019. Jane Jansen, kende tambe ta un hues local na Aruba, a termina cu su trayecto di formacion for di 2018, y entrante 1 di januari 2019 el a keda nombra como miembro di Corte, localidad Aruba. Mr. Jansen a keda instala na februari 2019. Tin un candidato mas den e trayecto di formacion (raio: ‘rechterlijke ambtenaar in opleiding’) y na januari 2020 un ‘raio’ nobo di Boneiro a cuminsa cu e trayecto di formacion.

EDIFICIONAN

Corte a encontra reto cu su edificionan na tur su respectivo localidadnan. Debi na problema den e edificio di Stadhuis,cu ya caba ta hopi bieu, tin hopi atencion pa e edificio aki. Un parti di e personal ta trahando temporalmente for di un otro edificio, cu tambe ta trece su retonan logistico cune. Den 2019 a tuma e prome pasonan pa por muda Corte temporalmente pa un otro edificio, di manera cu por renoba Stadhuis.

E localidad na Sint Maarten, cu ta keda den e edificio iconico yama Courthouse, a hasi un investigacion pa determina con por haci e edificionan di Corte resistente pa orcan y con por haci nan optimal pa practica administracion di husticia.

Na Boneiro pa basta tempo caba Corte ta buscando un edificio cu ta mas apropia. Tin dos edificio cu ta cumpli cu e rekisitonan funcional. Awor, investigacion lo mester demostra cual edificio ta mas apropia.

Na Aruba Presidente di Corte y Minister di Husticia a firma un acuerdo di uzo pa alohamento “bruikleenovereenkomst” y un acuerdo di delegacion “lastgevingsovereenkomst” pa e edificio di Corte. Den e acuerdonan aki ta formalisa e deber y derechonan mutuo di tanto Corte, como Pais Aruba.

FINANSA

Corte a alcansa un resultado positivo di f 147.000 den 2019. Por atribui e resultado aki pa gran parti na algun ingreso incidental, cu no ta origina di e operacion regular di Corte. E ingreso y gastonan incidental aki ta relaciona cu varios post di añanan anterior. E resultado di Corte, pa loke ta trata su operacion regular, ta f 50.000. Esaki ta un resultado particularmente positivo, pa motibo cu Corte mester a corta casi f 1.5 miyon (algo mas cu 4%) den su gastonan. Bestuur a hiba un maneho di reduccion stringente ariba su gastonan pa por a cumpli cu e obhetivo cu e tabata tin. A logra esaki pa gran parti tambe y cu esaki a (of en todo caso ta parse) cu a alcansa e limitenan di reduccion di gasto y di eficiencia operacional.

Lesa Relato anual 2019 digital AKI

 

  • Manera anticipa pa Noticiacla: Ex minister Besaril a recobra su libertad

    Manera anticipa pa Noticiacla: Ex minister Besaril a recobra su libertad

    ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes. 

  • Ex minister Besaril por recobra su libertad diabierna

    Ex minister Besaril por recobra su libertad diabierna

    ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan. 

  • Corte: Radioemisoranan mester paga DUCAPRO pa toca musica, y lo dicidi tarifa den dos luna

    Corte: Radioemisoranan mester paga DUCAPRO pa toca musica, y lo dicidi tarifa den dos luna

    ORANJESTAD – Radioemisoranan na Aruba mester paga pa por toca musica di artistanan. Esey ta un hecho!. Loke mester wordo determina ainda, ta e tarifa cu e fundacion DUCAPRO por cobra. Asina e huez cu a trata e caso sumario diabierna mainta den corte cu DUCAPRO a cuminsa contra di Q-Waves NV, conoci comercialmente como HITs 100FM, di e propietario Aldrich Croes. DUCAPRO a cuminsa e caso pasobra e radio lo no kier paga e suma mensual cu ta rekeri pa e paga pa haya derecho pa toca musica tur luna.  E propietario di e radio a sigura cu no ta cu nan no kier paga, sino cu nan tin problema cu e suma/tarifa. 

  • Ex minister Besaril ta keda encarcela pa 16 dia mas!

    Ex minister Besaril ta keda encarcela pa 16 dia mas!

    ORANJESTAD – Ex minister Guilfred Besaril su detencion awe merdia a keda prolonga cu 2 biaha 8 dia. Esaki kier men cu despues cu e la sinta su prome 8 dianan, huez comisario a haya ta necesario pa prolonga esaki un biaha mas, debi cu mas probable, no ta cla cu sea e interogacion of cu e investigacion, cu ta rekeri su detencion. Esaki pa evita cu e lo por influencia e loke ta investiga aworaki. E la keda deteni dia 13 di februari ultimo, relaciona cu e caso Tulipan unda cu ta acuse di corupcion y abuso di poder como minister tempo cu e tabata minister plenipotenciario na Hulanda. Despues dia 16 di februari a prolonga e detencion cu 8 dia mas. Awe, manera noticiacla a raporta anteriormente, e HC mester a dicidi si ta prolonga esaki. Y esey a sosode tambe. 

  • Awe ta dicidi si ta prolonga detencion di ex minister Besaril cu 8 dia mas

    Awe ta dicidi si ta prolonga detencion di ex minister Besaril cu 8 dia mas

    ORANJESTAD - Ex minister Guilfred Besaril ta ketobay deteni, y awe ta finalisa e 8 dia detencion conforme e proceso di detencion. E prome dos dianan siman pasa tabata den asina yama ‘in verzekering’, y despues a prolonga e detencion cu 8 dia mas. E 8 dianan aki ta vence awe, y e huez comisario tin cu dicidi si ta prolonga e detencion aki cu 8 dia mas of ta manda e persona cas, te ora cu su caso (Tulipan) keda presenta. Por ta cu ta dicidi cu mester mas tempo pa cual por prolonga e detencion cu 8 dia mas. Y si aun mester mas tempo, por prolongue cu 8 dia mas. Despues si mester prolonga atrobe, esaki ta bira 60 dia mas. Si awe ora cu e keda presenta dilanti e huez comisario, dicidi cu ta prolonga e detencion, esaki no kier men necesariamente si cu e tin cu keda (manera tabata e caso e siman aki) e 8 dianan completo deteni. E ex minister ta wordo acusa di entre otro corupcion y abuso di su poder tempo cu e tabata minister plenipotenciario na Hulanda durante e ultimo dos periodonan di Gabinete Wever Croes I y parti di II.

  • 'Caribisacion' di nos magistratura: Di 11 hues actual na Aruba, 6 tin pasado local

    'Caribisacion' di nos magistratura: Di 11 hues actual na Aruba, 6 tin pasado local

    ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “

  • Powered by SETAR