Residentenan tambe mester haci COVID-19 test ora nan bolbe Aruba

ORANJESTAD - Residentenan cu biaha pa exterior despues cu frontera habri, tambe mester haci e COVID-19 test sea prome cu subi avion pa bolbe Aruba of aki na Aruba. Asina gobierno di Aruba a bisa e siman aki den un comunicado. Ta trata di parti di e condicionan cu a pone ora habri frontera proximamente. 

CONDICION MAS  ESTRICTO

E condicion di mas estricto ta e 100% testing sea na nan pais di origen of aki na Aruba. E gastonan di e test ta core pa nan propio cuenta. Ademas Aruba ta exigi un seguro pa Covid pa cubri eventual gastonan di tratamento di Covid, cu den casonan extremo por ta gastonan di cuido intensivo hopi halto. E gastonan aki Gobierno no por carga.  Deliberacionnan ta andando cu tur compania di seguro na Aruba pa por ofrece e seguro aki y den e siguiente dianan lo duna mas informacion al respecto. E companianan local a bay di acuerdo caba pa brinda e cobertura di Covid-19. 

STUDIANTENAN

Pa nos studiantenan den exterior ta haciendo estudionan ainda pa mira si nan seguro ta cubri Covid. Si esaki ta e caso, nan no mester cera un otro seguro. Mientras frontera ta cera y probablemente mientras Covid ta un pandemia, probablemente e seguronan di biahe of di malesa conoci, no ta cubri gastonan di Covid. Ta bon pa cada studiante cu kier bin Aruba verifica esaki cu su seguro. Esaki ta conta tambe pa demas Arubianonan cu ta biba den exterior y kier bin bishita nan famia. E portal aki a compronde mientrastanto cu na Hulanda gobierno di Aruba via minister plenipotenciario ta haciendo tramite pa haya mas claridad riba e asunto di seguro pa studiantenan.