Corte: Clarisca Velasquez a perde caso y ta keda suspendi

ORANJESTAD – Clarisca Velasquez, polis di profesion a perde su caso den corte di Lar diaranson, cu ta nifica cu e ta keda suspendi por lo pronto. Huez a rechasa e peticion di su abogado Desiree Croes pa suspende e suspension. “Nos a keda hopi desapunta y mas ainda straña cu huez ta uza e echo cu Clarisca a haci denuncia como factor pa tene geschorst. Clarisca ta kere cu na final husticia lo vence y ta pura pa reanuda trabou”  su abogado Desiree Croes a bisa noticiacla.com diahuebs. 

E CASO

Clarisca Velasquez su abogado Desiree de Sousa Croes a entama un caso sumario na mei (18 di mei 2020) pa suspende e suspension cu cuerpo policial tin riba su cliente. Asina de Sousa Croes a confirma na noticiacla.com luna pasa. “ Mi entrega un bezwaarschrift contra e desicionnan tuma door di Korpschef den nomber di mi cliente Clarisca Velasquez” De Sousa Croes a cuminsa bisa. 

DEMANDA 

“Awe mi a entrega un Verzoek ex art. 94 LMA (un voorlopige voorziening, dus un Kortgeding den ambtenarenzaken)”. Segun De Sousa Croes, motibo ta cu KPA ta mantene su cliënte suspendi mientras e otronan por a bolbe trabou caba. “Y e tambe a duna su banda di medaya den un verhoor cu a dura mas cu 8 ora y no a permiti mi drenta cu mi cliënte” De Sousa Croes a sigui bisa. Velazquez ta suspendi for di dia 2 di mei, esta casi 5 siman awor. Ora cu a entama e caso, e tabata suspendi 16 dia.  

E CASO 

Dia 8 di mei ultimo,   Velazquez a entrega keho na landsrecherche contra 3 polis, entre nan e districtchef hoofd inspecteur Molina, onderinspecteur Phillips y brigadier Vrolijk. Segun Velasquez su abogado Desiree de Sousa Croes, ta acusa nan 3 di a comete 5 acto castigabel dia 29 manece 30 di april ora cu nan a drenta su villa sin su permiso. E kehonan ta varia di kiebro den cas y menasa, abuso di poder, violacion di privacidad y kiebro. Tur esaki a sosode pues ora cu nan a drenta e villa unda cu Velasquez tabata e anochi ey. 

CASO SUMARIO

A informa e tempo ey cu pa si e siman despues, e suspension impone riba Velasquez (e ta suspendi pa 6 siman) no keda clarifica y revoca, lo a entama un caso sumario pa Velasquez reanuda trabou. Algo cu a sosode tambe awe. Segun e abogado, a suspende Velasquez acusando e di e.o. meld malo intencionalmente, siendo cu e tin suficiente prueba cu el a bira malo y a meld esaki corectamente. Ademas esnan cu tabata cu ne tambe a meld ziek pero independientemente di otro, pues no 'orcherstra'. Velasquez ta alega cu den pasado recien un grupo di polis a meld ziek y no a tuma ningun medida contra nan. Den su caso si, y esey e ta condena. 

KICO A SOSODE

Segun Velasquez, e tres personanan contra ken a haci denuncia, a drenta su propiedad  e momento ey, violando un cantidad di regla. Segun e abogado de Sousa Croes, ta contra e tres agentenan policial mester actua y suspende y no su cliente. Velasquez mes ta sigura cu ningun momento e tabata burachi, ni tabatin un fiesta cu musica duro y tampoco a viola e regla di samenscholing. E regla ey no ta valido pa hendenan paden di cas. E ta sigura cu durante e anochi di 29 pa 30 di april, hunto cu 4 colega mas e tabata na un cas cu el a huur pa relaha y despedi di algun colega. E mes ta hefe di seccion di playa, y tabatin coleganan eynan, pero ningun momento a viola ningun ley ni tabata bebi, of droga of a comete orgia. Segun de Sousa Croes, su cliente no tabata sa ni kico e palabra ey tabata kier men.

PERSECUSION POLITICO

Segun Velasquez, e ta considera cu esaki tin un tinte politico debi cu e la forma parti di e partido di oposicion 8 aña como parlamentario, y 3 aña pasa el a bolbe den cuerpo despues cu el a bandona Parlamento. Segun su persona, tabata intencion pa susha su nomber, y esey ta algo cu e lo no permiti, pasobra esnan cu conoce, segun Velasquez, sa cu e no ta e persona cu nan a purba di pinta e anochi en cuestion.