Segun cabesante di Paso pa Futuro, minister no ta papia berdad

ORANJESTAD – Contrario na loke e mandatario responsabel pa enseñansa Rudy Lampe a declara awe mainta cu e cabesante di scol di Paso pa Futuro tabata di acuerdo cu e mudamento di e scol, cabesante Zelda Steenen, a desmenti esaki diahuebs atardi.“ Pa medio di esaki mi ta informa mayor, colega y tur presenta cu ningun momento mi tawata tin ningun combersacion cu minister Lampe tocante di mudamento y mucho menos cu mi a bay di acuerdo” e cabesante a laga sa. ”Tawata tin combersacion di fusering cu mi tawata obliga pa ta presente pero ta contra fusering tambe. Otro siman lo mi splica tur locual a pasa den e aña anterior y e aña escolar aki. Ta basta. e unico berdad mester sali” e cabesante a finalisa bisando. 

LAMPE SU VERSION

Lampe diahuebs mainta sinembargo a declara otro cos na noticiacla.com durante su conferencia di prensa, manera cu e portal aki a raporta caba. “Ta e cabesante di scol Paso pa Futuro mes a bay di acuerdo cu e mudansa pa e edificio cu loke awe ta entre otro Beatrix School na Seroe Blanco” Lampe a indica diahuebs. Riba pregunta di noticiacla.com pakico anto tabatin un protesta di docentenan un dia pasa contra e mudansa, e mandatario a bisa cu ta bay tin un reunion cu e ‘team’ pa wak unda e ‘malentendido alrespecto’ ta. 

PAKICO MUDANSA

Segun Lampe, e tin un aña dialogando cu e cabesante di e scol pa cu e cambionan. Y contrario na pensamento di e docentenan cu lo a protesta un dia prome, ningun momento no ta perhudicando ningun mucha cu ta bayendo Paso pa Futuro y tampoco e docentenan. A mustra cu e mudansa ta keda den Playa pues no ta mucho leu nan ta bay. Un di e motibonan pa e cambio ta cu e scol ta mucho grandi pa e grupo di ‘apenas’ 100 mucha, y esunan di Beatrix mester uni bek (nan ta separa den dos edificio diferente). “Pa transporte, bo no ta perhudicando ningun hende”. Pero segun informacion cu e portal tin, e problema ta cu muchanan di e scol lo por tin problema cu e espacio, y cu nan mester un espacio mas grandi pa por fungi. Riba esaki tambe Lampe a bisa cu esaki no ta un problema.