DIMP ta inicia entrega di plachi di number den weekend estilo ‘drive thru’

ORANJESTAD – Diasabra awor 13 di juni servicio di impuesto ta cuminsa otorga number di auto via un sistema di drive-thru. E intencion ta pa e proximo weekendnan, entrega 4 mil number pa fin di siman. Dos mil riba diasabra y dos mil riba diadomingo. Lo cuminsa cu A-1 sigui pa 2000 y diadomingo A 2001 pa 4000. Mester otorga un total di 50 mil number entre awor y fin di juli 2020. Pa por logra esaki, e departamento a establece henter un sistema logistico pa por logra e meta menciona. Lo cuminsa pa 9’or di mainta te 3’or di atardi. 

PROME SESSION DI NUMBER

E intencion ta cu e biaha aki ora cu e automobilista bin busca su number (e ta paga caba), e no tin cu baha for di auto. Lo tin coordinacion di e fluho di trafico di auto constantemente, cu ayudo di DOW y polis. Segun vocero di DIMP Meverly Romano, e via principal na departamento di finanza cu por drenta e direccion di edificio lo wordo cera completamente. Esaki kier men cu e trafico cu ta bin direccion aeropuerto cu ta bira pa drenta e edificio, esey lo no ta posibel. Tampoco no ta posibel pa drenta via Rumba straat banda di Plaza Betico, y tampoco pa pasa dilanti Ministerio Publico. Tur e camindanan aki lo wordo cera. E caminda lo wordo parcialmente cera na altura di DTZ. Asina cu e trafico cu lo wordo dirigi, ta drenta via avenida Milio Croes, na altura di e tire shop cu tin. Eynan e ta bin e area aki. 

CONTROL DI SEGURO

Na entrada dilanti di e edificio annex, unda cu normalmente lo busca plachi number, lo tin un station pa control di seguro. E seguro ta wordo controla eynan. Pa e motibo eynan, a pidi pa automobilistanan prome cu nan sali for di cas, pa nan prepara tur documentonan na man. Si na momento cu e persona yega na DIMP y ta bay coba e lachi di auto, bo ta wanta henter e fila. Despues di control di seguro, lo stempel e recibo di DIMP. Ta indica e ora pa drenta e parkinglot di DIMP. Riba e parkinglot lo tin diferente parti cu ta cera, pero lo tin guia di trafico cu lo guia e automobilista caminda cu e lo mester pasa. Dado momento e automobilista lo yega na e tentnan ubica unda cu e ta busca su plachi di number y asina e por sigui pa e salida cu ta esun na departamento di finanza. Di e forma aki DIMP ta planea pa guia e trafico mas miho posibel.