Lampe: No por pone nada preto riba blanco si no a dicidi nada

ORANJESTAD – “Mi no por pone preto riba blanco, cu a cancel algo si no tin decision pa cancel”. No tin niun decision tuma ainda riba temanan di enseñansa. Asina e minister cu tin e cartera ey Rudy Lampe a sigura Noticiacla.com diahuebs mainta durante e conferencia di prensa di gobierno. “Mi no por cancel algo cu no ta tuma (refiriendo na supuesto decisionan cu e mandatario lo a tuma). Pesey tin dialogo” Lampe a bisa. 

WEVER A BISA OTRO

Sinembargo tabata propio minister presidente Evelyn Wever cu a confirma cu decisionan tuma recien, a keda para por lo pronto. Lampe, sinembargo tin otro pensamento. E mandatario ta insisti cu e prome mandatario a declara mescos cune den Parlamento, cu ta start e proceso di dialogo. “No tin ningun decision tuma. Mi no por cancel algo cu no ta tuma” Lampe a sigui bisa. 

SINDICATO SIMAR 

Sindicato SIMAR ta un di esnan cu a cuestiona e declaracion di prome minister recientemente, indicando cu tin indicacion cu Lampe toch ta continua ehecutando su plan. Y como tal tanten cu no wak algo preto riba blanco, nan lo no kere e declaracionan haci cu a para tur decision di enseñansa. “Pesey tin dialogo. E dialogo por bay both ways. E por sigui, e no por sigui. Ta pesey bo ta dialogo. Pasobra si antemano caba bo sa cu e no ta bay door, pakico dialoga? Of si di antemano bo sa cu e ta bay door, pakico dialoga” Lampe a bisa. Pesey ora cu Parlamento segun Lampe a pidi pa tin dialogo, ta loke e ta haciendo tambe aworaki.