Oduber: Ta bay test tur pasahero cu yega Aruba 100% pa COVID-19

ORANJESTAD – Ta bay test tur pasahero (local y turista) cu yega Aruba 100%, unda cu lo tin un liña separa pa coordina henter e flow di turista cu yega Aruba. Asina minister di turismo, Dangui Oduber a bisa diaranson anochi durante e briefing di COVID-19 relaciona cu e reapertura di frontera pa otro siman.  Ademas turistanan cu yega Aruba ora cu frontera habri, lo mester yena un asina yama ED card 72 ora prome cu nan aborda nan avion pa Aruba, yena un self health declaration form y bisti un mondkapje durante e buelo pa Aruba. Cu reapertura di e frontera entrante otro siman dialuna, esakinan ta medidanan cu ta bay hunto pa sigura cu e reapertura no ta crea mas problema pa cu COVID-19. 

COVID TEST

E intencion ta pa encurasha tur turista pa pasa un test di COVID-19 prome cu nan aborda avion, pa nan upload e resultado di e test. Tur turista cu haci e test aki no ta wordo obliga e ora pa haci e test aki ora cu nan yega Aruba. Mas importante ta cu tur turista mester cera un seguro obligatorio pa COVID-19 na momento cu nan haci reserva y yena nan ED card. “Esaki ta bira obligatorio cu tur turista mester cera, cu eventualmente lo cubri gastonan di acomodacion si mester bay den isolacion of cuarentena, y tambe gastonan medico” Oduber a sigui bisa. Ta e compania y brokernan local ta esnan cu lo ofrece e seguro aki na e turista. Segun Oduber a clarifica despues na noticiacla, cu e intencion ta cu ora cu e turista yena e ED card, ta bin un link directo riba e ED carta pa e compania di seguro cu ta procesa e seguro y tur detaye. E  turista mes no mester bay busca contacto cu e compania di seguro e momento ey, den forma separa. E ta ‘vink’ af e partinan aki segun cu e ta registra riba e ED card, paga e gastonan y e ta cla. 

PROCESO ORA TURISTA YEGA ARUBA

Ora cu e turista yega Aruba, lo midi e temperatura di e turista manualmente. Lo tin control riba simptoma tambe, y lo tin docternan na aeropuerto cu lo haci diferente pregunta segun un triage, pa wak si nan ta reconoce simptomanan di COVID-19. Ta bay test tur pasahero cu yega Aruba 100%, unda cu lo tin un liña separa pa coordina henter e flow di turista cu yega Aruba. Turistanan cu nenga di haci e test, ta wordo obliga di bay den un cuarentena. Turistanan cu wordo getest y resulta cu e test ta positivo, no ta bay e hotel caminda nan a haci reservacion, sino ta bay check in na un acomodacion cu a wordo asigna door di ATA. Tin suficiente acomodacion asigna en caso tin turista positivo, identifica sea na aeropuerto of algun dia despues cu a desaroya simptoma. Tur esaki aeropuerto a traha ariba hunto cu hospital.