Kiwanis Club San Nicolas a cumpli cu varios proyecto

SAN NICOLAS - Durante e prome lunanan di existencia, Kiwanis Club of San Nicolas ya a completa 4 diferente proyecto pa nos muchanan y comunidad henter. E prome proyecto tawata participacion na Aruba Doet, caminda a a verf e biblioteca di Colegio Sta Teresita basisschool, pa asina fomenta e gana pa lesa, door di ta den un ambiente agradabel y safe.

Despues di esaki a sigui cu un “4-week online challenge”, caminda nos muchanan tawatin un reto diferente cada siman pa cumpli cu ne, di cual ganadornan a ricibi un premio cortesia di Domino’s Pizza. Esaki cu e meta pa entretene e muchanan cu tawata den cuarentena.

E di tres proyecto tawata un Food Drive pa fundacion Meals on Wheels. Cu tur e comestibel y fondo recauda durante e dia aki, Meals on Wheels lo provee esnan den necesidad cu un cuminda cayente tur siman pa un periodo di tres luna.

E proyecto mas recien ta un donacion di pakete di cuminda na 100 famia di alumnonan di diferente scol di San Nicolas y vecindario. E proyecto aki ta pa duna sosten na mayornan di muchanan di San Nicolas cu ta pasando door di momento nan dificil a consecuencia di e pandemia COVID-19. Esaki a wordo logra en colaboracion cu Fundacion Pa Nos Comunidad, y tambe Kiwanis Nederland. Den total a logra sera paketenan di comestibel pa 100 mucha, cual a wordo reparti na Kukwisa School, St. Paulus School, Sint Michael School, Colegio Santa Filomena basisschool, Colegio Cristo Rey, Colegio Sagrado Curason, Fontein Kleuterschool y Graf von Zinzendorf School. Cu e ayudo aki, kier aporta na garantisa cu e muchanan ta bon alimenta, pa asina por sigui cu bon desaroyo na scol, a pesar di e momento nan dificil aki.