Rijna: Arubianonan por biaha pa Bonaire te ora Aruba habri frontera pa Merca

KRALENDIJK – Bonaire a anuncia nan plan di reapertura di frontera diaranson merdia. Gezaghebber Edison Rijna a informa noticiacla e.o. cu Bonaire ta habri su frontera mayan te cu 30 di juni proximo como un prueba cu un grupo di 108 persona di Hulanda. Pa loke ta Aruba, e situacion ta diferente y ta cuminsa ricibi Arubiano desde 12 di juni proximo, esta diabierna awor. Segun Rijna a splica e portal aki, pasaheronan di Aruba cu ta biaha pa Bonaire, no mester bay den cuarentena. Pero na momento cu Aruba habri frontera pa laga Mericanonan drenta, ta cera e espacio aereo pa Aruba. Mes momento e mandatario ta spera cu Aruba kita e cuarentena pa pasaheronan for di Bonaire.  

E PROGRAMA PILOTO

Pa loke ta e programa piloto, esaki ta cuminsa diahuebs te cu 30 di juni. Ta trata di 108 persona (studiante y imigrante) cu lo yega for di Hulanda. A sigura cu tin condicionan si mara na esaki. Entre nan, ta test e pasaheronan na aeropuerto di Bonaire y desde otro siman tambe for di Hulanda. Ora cu nan yega e isla di Bonaire, nan ta bay den cuarentena na cas y ta monitoria nan eynan. Nan lo tin libertad pa haci compras solamente si no tin persona pa haci esaki pa nan. Y tin cu tene distancia social di 1.5 meter. 

CORSOU

Pa loke ta Corsou, ta crea un bubble, entrante 12 di juni. Un bubble ta un zona cu segun Rijna, ta safe pa biaha aden, di un isla pa otro. Mescos cu Aruba, pasaheronan di Corsou, no tin nodi di bay den cuarentena y por move liber riba e isla.