Dos persona a tira atraco arma riba cas na Dakota

ORANJESTAD – Dos persona arma diaranson mainta a tira un atraco algo prome cu 7’or riba un cas na Scopabelstraat na Dakota, y bay cu mas di mil florin. Vocero di polis Lito Laclé a confirma esaki awe mainta. E atracadornan tabata dos homber papiando spaño, cu a drenta e cas cu un arma di candela y un arma blanco y menasa e persona den e cas. A logra bay cu un suma di 1.700 florin. E atracadonan tabata bisti full na preto, manga largo y manga cortico y ambos ta personanan di color cla. 

PERSECUSION

Despues di e atraco, e dos personanan aki a huy bay direccion di sorsaca straat y lo a drenta un cas den Sint Vincentweg 2 A y B. Polis mesora a haci un entrada hudicial,basa riba declaracion di testigonan cu a wak un auto laga e dos personanan aki na e respectivo cas. Segun Laclé, full e area tabatin camera, cu a pone cu a identifica e auto su number (plachi) y ta mustra cu un ora pa otro lo por pone man riba e persona(nan). Por a nota cu polis a haci e entrada hudicial, cu presencia despues di fiscal mayor, cu a autorisa e entrada aki. Polisnan (atracoteam) a kibra portanan di e cas(nan) pa por a drenta y wak si por a localisa e personanan en cuestion.