Minister no tabata na altura di intento di mediacion di partido POR

ORANJESTAD – E noticia di mediacion di partido politico POR a bin completamente for di seno di partido. Pues den e sentido cu no tabatin acercamento cu e minister Marisol Lopez Tromp. Asina fuentenan cerca di e mandatario a confirma pa noticiacla.com. De hecho, e mandatario no ta(bata) na altura di e informacion ey. Por a compronde cu e intencion ta pa den curso di e dianan aki e partido acerca e mandatario of su representantenan pa cuminsa cu e proceso di dialogo y wak si por haya otro bek riba ‘e caminda corecto’, esta un caminda unda cu ambos partido (e partido su directiva y e minister) por biba cune. 

REACCION

For di prome minister Evelyn Wever, por a compronde cu e ta positivo riba e ultimo desaroyo aki, si esaki resulta. Segun un reaccion breve pa e portal aki, el a recorda cu e tabata hopi cla cu su mensahe pa ambos partido, esta cu mester resolve e asunto aki y cu no ta husto cu e pueblo ta bira ‘victima’ di un problema interno di un partido politico.