Docentenan di CSN a pone ultimatum pa minister Lampe

ORANJESTAD - Docentenan di Colegio San Nicolas (CSN) a pone un ultimatum pa minister di enseñansa Rudy Lampe reuni cu nan. Asina nan ta bisa den un comunicado cu noticiacla.com a ricibi. Segun e grupo di docente aki, nan ta hopi disgusta con e minister ta tuma decision sin consulta cu e docentenan. A compronde cu  Minister di Enseñansa lo a sinta cu Simar dialuna dia 8 di juni 2020 y cu lo bin ahustacionnan den e Ministeriele Beschikking (MB), pero atrobe no a sinta cu e docentenan di CSN. “Atrobe nos no sa ki e cambionan ta encera y ta urgi un dialogo cu Minister di Enseñansa prome cu diahuebs dia 11 di juni 2020 pa 12or di merdia” e grupo ta bisa. 

Segun e docentenan, nan ta puntra con ta posibel cu no kier duna oido na e profesionalnan cu ta traha directamente cu e alumnoy ta puntra si porta esaki ta e “normal nobo” cu tur cos nos mester tende via social media? “ Den nos comunicado di ayera nos a pidi publicamente un reunion cu Minister di Enseñansa pa sinta cu nos y scucha nos preocupacionnan pa cu e decisionnan tuma tocante e maneho y futuro di nos scol. Y atrobe, lamentablemente, nos mester bolbe scucha for di Simar cu decisionnan a bolbe wordo tuma sin dialogo. Nos a cansa di sinta warda riba dialogo siendo cu e decisionnan a wordo tuma caba” e comunicado ta sigui bisa. 

E docentenan ta bisa cu nan no kier bay bou stichting. E opinion ta cla y no mester di dialogo. Echo ta cu Minister President a anuncia esaki diabierna ultimo, e docentenan ta recorda. “Nos no kier un management team, sino rector y conrectornan pa guia e scol y eventual dialogo. Pakico mester di un management team si den e cuerpo di docente mes tin persona capacita? Cuerpo di docente kier mira cu e MB ta wordo declara nulo. Dialogo no ta necesario” nan ta puntra.

“ Nos kier dialoga si riba educacion bilingual cu minister ta boga p’e of pa traha hunto cu otro instancia pa bin cu educacion bilingual” e comunicado ta finalisa bisando.