Diaranson bar y clubnan nocturno ta habri bek cu ora special

ORANJESTAD – Relaciona cu fase 3 di reapertura local di Aruba (den cuadro di crisis COVID-19) cu a cuminsa 3 di juni ultimo, prome minister di Aruba Evelyn Wever Croes, a anuncia dialuna anochi durante e briefing cu diaranson awor, bishita na casnan di cuido di nos grandinan ta permiti atrobe. Ademas ta habri bar y clubnan nocturno pero cu cierto oranan limita y deporte paden pero no di contact, ta permiti atrobe, y conferencia y lugarnan di reunion y lugarnan di fiesta.

TUR SECTOR?

Ainda tin sector cu no ta wordo habri, manera casino y deporte di contacto. Y tambe evenementonan publico ainda no ta permiti. A anuncia tambe e orarionan di cierre di tur establecimento lo ta diferente. Tambe pa clubnan nocturno. E orario lo ta 11or di anochi. Esey kier men algo positivo pa restaurantnan cu por habri un ora mas laat, pero pa clubnan nocturno e por ta un drempel. Esaki pasobra clubnan nocturno di experiencia ta funciona miho mas laat, pero esey ainda no ta posibel.