Aruba tabata un chaos den weekend den wowo di polis

ORANJESTAD – Den wowo di orden publico, fin di siman Aruba tabata un ‘chaos’. Asina alto comisario interino di polis Vanessa Tjon Kock a bisa durante e briefing pa COVID-19. Segun Tjon, e tabata un chaos pasobra niun hende no kier a mantene nan mes na ningun regla, lamentablemente. “Pesey mi kier a enfatisa riba e parti kico exactamente ta polis den e dianan aki” Tjon a sigui bisa.

DECRETO MINISTERIAL

A mustra cu polis ta trahando a base di un decreto ministerial. Tabatin hopi critica riba polisnan individual y e organisacion cuerpo policial.  Esey pasobra polis mester a haci control riba principalmente horeca y lugarnan nocturno. Aki hopi aparentemente no a tene nan mes na e reglanan. 

DISCUSION RIBA PERMISO

Tabatin hopi discussion riba e asunto di permiso y kico exactamente tabata un decreto ministerial. Tjon a mustra cu enberdad pa doñonan di establecimento, e reglanan actual no ta esun mas lucrativo cu por tin. Pesey a delibera atrobe con pa habri cierto sectornan y toch ainda controla nan tambe. A base di esey a bin cambionan manera apertura di clubnan nocturno y bar pero te na un ora limita (11’or di anochi). Tabatin confusion kico ta compronde bou di un bar, un nightclub of algo parecido. E adaptacion di horario ta den interes di tur hende segun Tjon.