Partido POR awor ta evaluando pa dialoga

ORANJESTAD - Parce cu dentro di partido POR y e minister en cuestion (Marisol Lopez Tromp) tin cosnan a cuminsa cambia y cu lo ta re-evaluando e situacion y posicion di ambos. Despues di a exigi retiro di nan minister Marisol Lopez Tromp, dialuna anochi nan a anuncia diripiente cu nan a nombra un comision di mediacion. Segun un comunicado di e partido dialuna anochi, nan ta bisa cu e 'hecho ta cu e mensahe cu Partido POR a dirigi na Minister Marisol Lopez Tromp a wordo tuma hopi na serio". " Na mes momento a tuma nota cu tin espacio pa dialogo" e comunicado ta sigui bisa. No ta conoci ken a acerca ken pa e dialogo pasobra e comunicado no ta specifica esey. "Mirando e crisis mundial cu nos Pais ta pasando den dje y e embergadura y impacto grandi cu cualkier sigiuente paso cu lo por wordo tuma lo por tin, Partido POR a nombra den interes general di nos Pais un comishon di mediacion, pa explora tur posibilidad prome cu partido evalua un sigiuente paso" e comunicado ta finalisa bisando.

E panorama politico no tabata mustra mucho positivo, cu un crisis politico mey mey di un crisis di COVID. Mirando cu Marisol Lopez Tromp no tabata cla pa retira, esaki tabata mustra un pa un posibel 'showdown' unda cu lo ta tin solamente pededor. Tambe den dia, prome minister Evelyn Wever a haci apelacion na tanto POR como Lopez Tromp pa regla e 'asunto' aki internamente. No ta conoci si esey a pone partidonan reconsidera toch, y evita e posibel showdown politico. Un encuesta realisa pa noticiacla a mustra cu 77% di esnan encuesta, (lesadornan di noticiacla), tabata pro pa Lopez Tromp keda minister. Y e posibel scenarionan pa POR, no tabata mustra bon. Lo spera wak kico e mediacion aki lo trece na cla.