Mas di 77% kier Marisol Lopez Tromp keda como minister

ORANJESTAD – Segun un encuesta haci pa noticiacla.com durante fin di siman (cu a caba dialuna atardi), un mayoria absoluto (77.86%) di e 2565 usuarionan di Noticiacla.com cu a participa, ta haya cu Marisol Lopez Tromp no mester retira como minister. Mas homber cu muher a participa na e encuesta aki, y e grupo di edad entre 45 y 54 aña a domina den e encuesta. Hecho ta, cu e mayoria no kier pa e mandatario retira. Manera semper, e encuesta ta uno entre e usuarionan di noticiacla.com y e resultado tabata anonimo.   

MARISOL MESTER KEDA OF NO

Manera ya raporta, e mayoria absoluto (77.86%) cu ta 1997 di e 2565 a contesta e pregunta ey a vota pa Lopez Tromp keda como minister, mientras cu un grupo di 477 usuario (18.60%) kier pa e retira. Un grupo mas chikito, tabata ‘neutral’, esta a vota pa e opcion, ni si, ni no. Nan no ta interesa. E grupo aki tabata esun mas chikito pero toch yegando 100, esta 91, cu ta 3.55% di e cantidad total. 

SEXO

Pa loke ta e seccion di sexo, 2553 a contesta e pregunta aki, y aki e hombernan a domina e seccion. Un total di 1374 homber (53.82%) a participa, contra 1170 muher (45.83%). Tambe tabatin e grupo nomina como ‘otro’, cu ta un grupo den nos comunidad, - den tur comunidad- cu ta identifica nan mes ni como homber ni como muher. Aki tabatin 9 persona (0.35%). 

EDAD

Den parti di  grupo di edad, un total di 2554 persona a participa, unda cu tabatin 7 categoria. E categoria bou 18 aña (tabatin 8 persona, 0.31%), entre 18-24 aña (86, 3.37%), 25-34 aña (419, 16.41%), 35-44 aña (621, 24.31%), 45-54 aña (653, 25.57%), 55-64 aña (520, 20.36%), 65 y mas halto (247, 9.67%)

NOTA: Noticiacla.com a conduci e encuesta entre diasabra merdia 6 di juni 2020 pa dialuna 8 di juni 2020 unda cu 2566 persona (usuario di Noticiacla.com) a participa.