Marisol Lopez Tromp a bisa cu e no ta retira como minister

ORANJESTAD – Señora Marisol Lopez Tromp no ta entrega su retiro como minister. Esaki tabata su contesta specifico durante un conferencia di prensa di algo mas di 45 minuut dialuna mainta na pia di Hooiberg. E mandatario a repasa tur supuesto motibo duna pa partido POR cu e mester retira, y a bisa cu e no ta mira motibo valido pa e retira. Mes momento contestando pregunta di noticiacla.com, e la sigura cu e partido lo ricibi su contesta proximamente. Tambe, riba pregunta di e portal aki, a sigura cu su dianan ta sigui como ‘business as usual’ te ora cu tin un cambio.   

E CONFERENCIA

E mandatario a cuminsa na repasa e carta cu el a ricibi diabierna di partido POR, mas specifico, colega minister Andin Bikker. E no ta considera cu e carta ta uno huridicamente corecto, unda cu ta menciona puntonan cu no ta valido. E punto ta cu e reunion cu a yama pa atende cu e mandatario, no ta cuadra cu e statutonan di e partido, y no tin cu base legal. Como tal, segun Lopez, e carta no ta valido. 

PARTIDO NO POR EXIGI RETIRO

A mustra cu partido no por exigi retiro di un minister, sino cu ta Parlamento ta esun cu ta autoridad segun constitucion pa dicidi si un minister ta wordo retira of no, pa medio di un mocion. Segun Lopez, colega minister Bikker tin e conviccion cu e ta convenci cu Parlamento lo tin intencion di baha Lopez Tromp como minister. “E ta kere cu e por instrui mi, mi no sa den ki posicion, pasobra esaki no ta posibel tampoco como lider di partido of minister di husticia, pa pone un pen abou y no firma mas” Lopez a sigui bisa. “Ta gobernador bo a kere bo ta?” Lopez ta sigui puntra. 

CRISIS Y PROME MINISTER

Mientras cu e ta confirma cu a papia cu minister presidente Evelyn Wever Croes riba e tema, e no ta kere cu Wever lo haci apelacion riba dje pa ‘buena marcha’, e retira y evita un crisis den gobierno. Asina e mandatario a contesta e portal aki. Segun Lopez, minister president Wever tabata hopi cla den su contesta unda cu e ta un asunto di partido. “Y na di dos lugar e no a hinca su mes den esey pa bisami si mi tin cu retira of no” Lopez Tromp a sigui bisa. “Mi no ta imagina mi cu e lo recuri na esey si e la vocifera su mes hopi cla caba” Lopez a contesta riba e pregunta cu si minister president haci apelacion na dje pa evita un crisis y pa ‘buena marcha’, e lo retira. E mandatario lo sigui su trabou normal como minister. “Mi no a haci nada robez. Es mas ministernan cu a haya nan den pasado cu caso penal grandi cu prueba, y cu prueba pa bay cera, nan a sigui cu nan funcion hasta cu nan salario” Lopez. E mandatario a sigui tambe riba e temanan manera parke Arikok y Serlimar rond di cual lo ta e motibonan cu lo a conduci na peticion di retiro di e mandatario. Wak e conferencia completo bek AKI.