Campaña di vacunacion escolar ta continua

ORANJESTAD - Seccion Cuido Salud Hubenil di Departamento di Salud Publico ta e seccion encarga cu vacunacion di nos muchanan.

Debi na e pandemia di covid-19 cu a haci cu mester a cera scolnan, hopi mucha a keda falta un of otro vacuna pa nan edad. Mirando cu scol a  habri bek un paar di simannan prome cu vakantie grandi  Seccion Cuido Salud Hubenil ta probecha di e dianan aki pa duna e muchanan cu a keda falta nan vacuna esaki ainda.

Pa medio di e relato di prensa aki DVG a pidi mayornan encarecidamente pa laga nan yiu bin scol riba e dia cu e enfermera di Cuido Salud Hubenil ta na scol. Vacunacion escolar lo tuma lugar entre 8 cu 19 di juni y lo vacuna muchanan di kleuter y scol basico cu falta vacuna segun e skema di vacunacion di Aruba y mucha muhernan den klas 6 lo wordo vacuna contra Human Papiloma Virus (HPV).

Scol lo informa mayor(nan) si nan yiu falta vacuna y riba cua dia vacunacion lo tuma lugar na scol. Tur e muchanan cu ta haya vacuna, ta muchanan cu nan mayornan ya a duna autorisacion caba pa  esaki.