SVB: No ta cubri trahado cu biaha pa pais cu tin COVID-19 y mester bay den cuarentena

ORANJESTAD – Un trahado (di Aruba:red) cu entrante 15 di juni 2020 (of ora cu frontera habri bek:red) biaha pa exterior pa un pais caminda tin casonan positivo di COVID-19, y na su regreso ta wordo obliga pa bay den cuarentena, no tin derecho riba beneficio pa malesa, durante cu e ta den cuarentena. Asina Sociale Verzekerings Bank (SVB) a anuncia dialuna. Den un aviso cu tin tambe riba noticiacla.com, esaki ta keda publica.

MOTIBO

Segun SVB, e motibo ta cu lo considera e acto aki (di biaha pa un pais cu tin casonan positivo) di COVID-19, como ‘sumamente negligente’. Pues e tin un ‘culpabilidad grave (grove schuld)’. ARticulo 7 bou di punto 1A di e Ordenansa di Seguro di Malesa ta stipula cu e trahado no tin derecho of ta perde e derecho riba beneficio pa malesa (ziekengeld) si e malesa ta debi na intencion (opzet) of culpabilidad grave (grove schuld) di e trahado. Lo haci excepcion soalmente pa personanan cu wordo manda pa exterior pa un tratamento medico, cu aprobacion di AZV. 

NO POR BIAHA

Esaki por wordo interpreta cu basicamente ta nifica cu casi no por biaha mas pa ningun pais, of un cantidad hopi limita, pasobra e paisnan unda cu no tin caso di COVID-19 ta masha masha limita. Entre nan tin Bonaire so aworaki y por ta algun mas den region.  Pero paisnan manera Hulanda y Merca ta yen yen di caso, aunke cu Hulanda lo tin e situacion ‘bou di control’. Pues biahamento pa e paisnan aki ta riba risico y no ta wordo cubri ora cu bolbe si e persona bay den cuarentena ora cu e bolbe y si e bira malo. Tur gasto lo core pa nan propio cuenta e ora.